Qozog‘istonda mamlakatning birinchi prezidenti Nursulton Nazarboyevning ukasi, tadbirkor Bolat Nazarboyev 70 yoshida vafot etdi. Bu haqda sobiq davlat rahbari matbuot kotibi Aydos Ukibayga tayanib, “RBK” xabar berdi.
Amaldagi prezident Qosim-Jo‘mart To‘qayev hamdardlik bildirdi. Marhum uzoq vaqtdan buyon xasta bo‘lgan. Noyabr oyi boshida sobiq prezidentning ukasi Olmaota markaziy klinik shifoxonasiga yotqizilgan. 365info.kz portali bunga miokard infarkti takrorlanishi sabab bo‘lganini yozgan.
O‘tgan yozda “Express K” portali Bolat Nazarboyevga halqum saratoni tashxisi qo‘yilgani haqida ma’lum qilgan.
Bolat Nazarboyev 1953-yil 23-martda Olmaota viloyatining Shamalgan qishlog‘ida tug‘ilgan. Oliy yuridik ma’lumotga ega bo‘lib, 1989-yildan tadbirkorlik bilan shug‘ullangan. 1992-yildan 1997-yilgacha Qozog‘istonning yirik qishloq xo‘jaligi mas’uliyati cheklangan jamiyati “Inkar Agro” vitse-prezidenti bo‘lgan. 1997-yildan beri u BN Invest moliyaviy-sanoat xoldingiga rahbarlik qilgan.
Oxirgi ikki yil ichida Nazarboyev ismi turli aktivlarni xususiylashtirish natijalari ko‘rib chiqilgan ko‘plab sud ishlarida paydo bo‘lgan. Fevral boshida Qozog‘iston hukumati Bolat Nazarboyev shirkatlariga tegishli 299 gektar yerni tortib olgan. Amanat partiyasi qoshidagi Davlat boshqaruvini rivojlantirish va korrupsiyaga qarshi kurash bo‘yicha jamoat kengashi raisi Yerlan Sairovning so‘zlariga ko‘ra, Ostona, Olmaota, Talgar, Kaskelen va Turkiston viloyatidagi uchastkalar “shubhali sharoitda” qo‘lga kiritilgan.
Izoh (0)