Rossiya prezidenti Vladimir Putin Kremlda Qozog‘iston birinchi prezidenti Nursulton Nazarboyevni qabul qildi. Putin uni anchadan buyon taklif qilib kelayotganini aytdi. Siyosatchilar ikki mamlakat hamkorligi va koronavirus bilan bog‘liq vaziyatni muhokama qildi.
Nazarboyev Qozog‘iston va Rossiyaning o‘zaro aloqalarini davlatlararo munosabatlarning namunasi deb atadi. “Bizning munosabatlarimiz tarixi, Rossiya va Qozog‘iston o‘rtasidagi munosabatlar shunchalik barqarorki, ular, ehtimol, davlatlararo munosabatlarning namunasidir. Men ushbu yo‘nalishni saqlayman”, — dedi Nazarboyev.
Shuningdek, u pandemiya paytida Qozog‘istonga yordam bergani uchun Rossiyaga minnatdorchilik bildirdi.
“Pandemiya paytida Rossiya butun Qozog‘istonni vaksinalar, dori-vositalari va hokazolar bilan qo‘llab-quvvatlagani uchun shaxsan o‘z minnatdorchiligimni bildirmoqchiman. Yodingizda bo‘lsa, biz Sankt-Peterburgdagi ko‘rgazmaga borgandik, o‘shanda qo‘shma korxona to‘g‘risida kelishib olgandik. Hozir Qarag‘andadagi ushbu qo‘shma korxona Rossiya vaksinasi bilan bir xil sifatda va yirik hajmda vaksina ishlab chiqaradi”, — dedi Qozog‘istonning sobiq prezidenti.
Shuningdek, Nazarboyev rossiyalik shifokorlar guruhi uni koronavirusdan xalos qilganini aytdi.
“Kasal bo‘lib qolganimda rossiyalik shifokorlar guruhi o‘n kun yonimdan jilmadi. Bu mening tuzalishimda hal qiluvchi omil bo‘ldi, men bularni unutmayman”, — dedi Nazarboyev.
Qozog‘istonning birinchi prezidenti, hukmron “Nur Otan” partiyasining raisi va Xavfsizlik kengashi rahbari Nursulton Nazarboyevga 2020-yilning 18-iyunida koronavirus tashxisi qo‘yilgan edi. O‘shanda 79 yoshli siyosatchi o‘zini izolyatsiyaga olib, ishlashni davom ettirdi. 2020-yil 2-iyulda u COVID-19’dan tuzaldi.
2021-yilning 25-iyunida Nazarboyev Qarag‘anda farmatsevtika zavodida ishlab chiqarilgan Rossiyaning “Sputnik V” vaksinasi bilan emlandi.
Izoh (0)