Shavkat Mirziyoyevga Qozog‘iston birinchi prezidenti Nursulton Nazarboyevning “Mening hayotim. Qaramlikdan ozodlikka” nomli memuarlar kitobi yetkazildi. Bu haqda “O‘zA” xabar berdi.
Nazarboyevning matbuot kotibi Aydos Ukibay 6-dekabr kuni tashrif bilan O‘zbekistonda bo‘ldi. U Prezident administratsiyasida o‘tgan uchrashuvda Shavkat Mirziyoyevga Qozog‘iston birinchi prezidentining salomi va eng ezgu tilaklarini yetkazdi. Shuningdek, Nursulton Nazarboyevning “Mening hayotim. Qaramlikdan ozodlikka” nomli memuarlar kitobining muallif dastxati tushirilgan nusxasini topshirdi.
Tarixiy jarayonlar va shaxsiy munosabatni o‘zida mujassamlashtirgan kitobda Nursulton Nazarboyev o‘zining hayotiy yo‘li, mamlakatning shakllanish va rivojlanish davri to‘g‘risidagi xotiralari bilan o‘rtoqlashadi. Siyosatchi respublikaga rahbarlik qilgan oxirgi o‘n yilliklardagi voqealarga baho beradi.
Shuningdek, o‘z asarida Nursulton Nazarboyev O‘zbekiston yetakchisi, “atoqli siyosiy arbob Shavkat Mirziyoyevni” alohida qayd etgan.
Kitobda O‘zbekiston prezidenti tomonidan olib borilayotgan, mamlakat iqtisodiy salohiyatini oshirishga xizmat qilayotgan islohotlar yuksak baholangan. Qozog‘iston bilan har tomonlama aloqalar yanada jadal rivojlana boshlangani, Shavkat Mirziyoyev prezident sifatidagi faoliyatining ilk kunlaridanoq qardosh mamlakatlar bilan hamkorlikni mustahkamlayotgani mamnuniyat bilan qayd etildi.
Izoh (0)