Kataloniya Oliy sudi Nazarboyevlar oilasiga tegishli bo‘lgan mulkning bir qismini davlat mulkiga o‘tkazishga qaror qildi. Bu haqda “Vixod k moryu” nashri xabar berdi.

Ma’lum qilinishicha, gap Timur va Dinara Kuliboyevlarga (Nursulton Nazarboyevning kuyovi va o‘rtancha qizi) tegishli kompaniyaga aloqador Can Juncadella mulki haqida ketmoqda. Hozirda sud jarayoni davomida mulkni topshirish tartibi ishlab chiqilmoqda.

“Ispaniyaning Lloret de Mar shahrida 2007-yilgacha ochiq bo‘lgan va mahalliy aholi va sayyohlar uchun qimmatli bo‘lgan hudud Flinder Data SL tomonidan sotib olingan. U Timur va Dinara Kulibayevlar bilan aloqador bo‘lib, kompaniya menejerlari turli vaqtlarda Petrokazakhstan Oil Products prezidenti Asilbek Karibayev va Sharqiy Qozog‘iston viloyatining sobiq hokimi Danial Axmetov bo‘lgan”, — deyiladi xabarda.

2009-yildan beri mahalliy aholi mulkni jamoat foydalanishiga qaytarishni ilgari surmoqda. 2015-yildagi sud jarayonida Lloret-de-Mar meri Ksavyer Krespo Nazarboyev mulki qurilishini qonuniylashtirganlikda ayblangan, biroq mulkning o‘zi hamon Flinder Data SLga tegishli.

Mutaxassisla fikriga ko‘ra, Can Juncadella mulki 20 gektarni egallaydi va uning hududidagi villaning umumiy maydoni 3200 metr kvadratni tashkil qiladi. Asosiy uyda 13 ta yotoq xona, kamida 19 ta hammom, bitta suzish havzasi, uchta sauna va katta garaj mavjud. Hududda o‘rmon, futbol, basketbol maydoni, xizmatchilar uchun binolar bor.

Eslatib o‘tamiz, Flinder Data SL kompaniyasi ushbu ko‘chmas mulkdan tashqari, 2021-yilgi audit hisobotiga ko‘ra, Ispaniyada umumiy qiymati 58 million yevro (61 million dollar) bo‘lgan o‘nlab boshqa mulklarga ega.