Qozog‘istonning sobiq prezidenti Nursulton Nazarboyev Moskvada Rossiya prezidenti Vladimir Putin bilan uchrashdi, deb xabar berdi qozog‘istonlik siyosatchining matbuot xizmati.
Tomonlar ikki davlat o‘rtasidagi munosabatlarnining 30 yilligi sharafiga bir-birini tabrikladi. “Qozog‘iston va Rossiya o‘rtasidagi hamkorlik teng huquqli muloqot asosida rivojlanib borayotgani qayd etildi”, — deya qo‘shimcha qildi matbuot xizmati.
Bundan tashqari, Putin va Nazarboyev o‘rnatilgan do‘stona aloqalar bundan buyon ham davom etishiga ishonch bildirib, bir-biriga mustahkam sog‘lik va farovonlik tiladi.
Kreml uchrashuv haqida e’lon qilmagan.
Bu Nazarboyev va Putinning Qozog‘istonda konstitutsiya bo‘yicha referendum o‘tkazilganidan keyingi ilk rasmiy uchrashuvidir. Asosiy qonundan Nazarboyevning huquqiy maqomi va vakolatlari haqidagi qoidalar chiqarib tashlandi, prezidentlik muddatlari soniga ham cheklovlar kiritildi. Bundan tashqari, Nazarboyevning elbasi, ya’ni xalq yetakchisi maqomi istisno qilindi. Shu bilan birga, yangi konstitutsiya matnida Nazarboyev “mustaqil davlat asoschisi” sifatida qoldi.
Nazarboyevning siyosatdan chetlashtirilishi Qozog‘istonda 2022-yil yanvarida bo‘lib o‘tgan norozilik namoyishlarida bildirilgan talablardan biri edi. To‘polon paytida Olmaota aeroporti va ma’muriyat binolari tortib olindi, do‘konlar talon-taroj qilindi. Bosh prokuratura ma’lumotlariga ko‘ra, namoyishlar natijasida 230 kishi halok bo‘lgan. Namoyishlar bostirilgach, birinchi prezidentning uch kuyovi, uning jiyani va boshqa qarindoshlari mansablarini, Nazarboyevning o‘zi esa Qozog‘iston Xalq Assambleyasi va Xavfsizlik Kengashiga umrbod raislik qilishdan mahrum bo‘ldi. Bundan tashqari, u keyinchalik nomi “Amanat” deb o‘zgartirilgan hukmron “Nur Otan” partiyasining rahbari lavozimidan chetlatildi.
Nazarboyev Qozog‘istonni qariyb 30 yil boshqargan. U 2019-yilning 20-martida prezidentlikdan ketgan.
Izoh (0)