Rossiya prezidenti Vladimir Putin koronavirusga qarshi “Sputnik V” vaksinasi bilan emlangan. Bu haqda uning o‘zi tog‘ridan to‘gri efirda ma’lum qildi, deb yozadi Meduza.
“Men (virusdan) iloji boricha uzoq vaqt himoyalanishim kerakligini tushungan holda, ‘Sputnik V’ bilan emlanishga qaror qildim. Bundan tashqari, Qurolli Kuchlarimiz ham ‘Sputnik V’ bilan emlangan, men axir oliy bosh qo‘mondonman”, — dedi Putin.
Vaksinaning ikkilamchi ta’siri haqida gap ketganda, u ikkinchi inyeksiyasidan keyin kechqurun tana harorati 37,2 darajaga ko‘tarilganini payqagan, ammo ertalab harorat normal holatga — 36,6 ga tushgan. Shuningdek, Putin “Sputnik V” bilan emlangan qizining ham harorati 37,5 ga ko‘tarilganini aytdi, ammo keyin hammasi joyiga tushgan.
Nima sababdan kameralar bilan omma oldida emlanmagani haqidagi savolga Putin quyidagicha javob berdi: “Agar vaksina qo‘ldan emas, balki boshqa joydan qilinganda, uni ham ko‘rsatish kerak bo‘lardi”.
“Umid qilamanki, men emlandim desam, mamlakat fuqarolarining aksariyati, bu haqiqat ekanini tushunadi... Menimcha, ushbu darajadagi kishilar mayda firibgarliklar bilan shug‘ullanmaydi”, — dedi Putin.
23-mart kuni Putin koronavirusga qarshi vaksinaning birinchi dozasi bilan emlangandi. Putin omma oldida emlanishdan bosh tortgan. Peskov prezident “kameralar nishoni ostida” vaksina olishni yoqtirmasligini aytgandi. Prezident matbuot kotibi Putin “vaksinalar targ‘iboti uchun shundoq ham ko‘p narsa qilayotgani”ni ta’kidlagan.
14-aprel kuni esa Putin vaksinaning ikkinchi dozasini qabul qildi. Shu paytgacha uning qaysi vaksina bilan emlangani noma’lum edi. Kreml bu ma’lumotni oshkor qilishdan bosh tortgandi.
Mart boshida davlat rahbarlaridan Ukraina prezidenti Vladimir Zelenskiy koronavirusga qarshi emlangani, Hindiston bosh vaziri Narendra Modi koronavirusga qarshi mamlakatda ishlab chiqarilgan COVAXIN vaksinasining birinchi dozasini olgani, shuningdek, dunyoning eng badavlat kishilaridan biri, Berkshire Hathaway bosh direktori Uorren Baffett Pfizer/BioNTech kompaniyasining vaksinasi bilan koronavirusga qarshi emlangani haqida xabarlar berilgan.
25-iyun kuni Eron oliy rahnamosi Oyatulloh Ali Xomanaiy va Qozog‘iston birinchi prezidenti Nursulton Nazarboyev koronavirusga qarshi emlangani haqida xabar berildi. Xomanaiy mamlakatda ishlab chiqarilgan “Eron Barakat” koronavirusga qarshi vaksinasining birinchi dozasini olgan. Nazarboyev esa Qozog‘istonning Qarag‘anda farmatsevtika zavodida ishlab chiqarilgan “Sputnik V” vaksinasining birinchi komponentini qabul qilgan.
Izoh (0)