Qirg‘iziston prezidenti Sadir Japarov 23-iyul kuni koronavirusga qarshi vaksina qabul qildi. Bu haqda Kloop xabar berdi.
Vaksinatsiyadan so‘ng Japarov fuqarolarni undan o‘rnak olib, koronavirusga qarshi emlanishga chaqirdi. Japarov Xitoyda ishlab chiqarilgan Sinopharm vaksinasining birinchi dozasini oldi.
Bungacha prezident matbuot xizmati Japarov emlanmagani, chunki unda antitanalar miqdori yuqori ekani haqida xabar bergan edi. Keyinroq Sog‘liqni saqlash vazirligi rahbari Alimqodir Beyshenaliyev ham xuddi shunday bayonot bergan. Beyshenaliyev prezidentda antitanalar kamayadigan bo‘lsa, unga emlanishni taklif qilishini qo‘shimcha qilgandi.
Qirg‘izistonda aholini emlash kampaniyasi 2021-yil mart oyida boshlangan. Ammo vaksinatsiya 12-iyuldan — mamlakatga Sinopharm vaksinasining ikkinchi partiyasi yetkazib berilgandan so‘nggina faol bosqichga kirdi.
Shundan so‘ng darhol Sadir Japarov muassasalarga qishloq kengashlarining ijro organlarigacha barcha davlat organlari xodimlarini emlashni buyurdi. Shu bilan birga, butun mamlakat bo‘ylab 900 ga yaqin vaksinatsiya punktlari ochilib, ularda aholini bepul emlash yo‘lga qo‘yildi.
Hozirda Qirg‘izistonda uch turdagi vaksinalar qo‘llanmoqda—-Xitoyning Sinopharm, Rossiyaning “Sputnik V” va AstraZeneca shved-ingliz vaksinalari.
Qirg‘iziston Sog‘liqni saqlash vazirligining ma’lumotlariga ko‘ra, 23-iyul holatiga mamlakatda 300 mingdan ziyod odam vaksinaning birinchi dozasini olgan, 100 mingdan ortiq odam ikkinchi dozasi bilan emlangan.
Mamlakatda pandemiya davrida 155 005 kishida koronavirus qayd etilgan. Bu vaqt ichida COVID-19 bilan kasallangan 2227 bemor vafot etgan.
Aprel oyi boshida Qozog‘iston prezidenti Qosim-Jo‘mart To‘qayev koronavirusga qarshi Qarag‘anda farmatsevtika zavodida ishlab chiqarilgan “Sputnik V” vaksinasi bilan emlangandi. 25-iyun kuni Qozog‘iston birinchi prezidenti Nursulton Nazarboyev ham xuddi shu turdagi vaksinaning birinchi dozasini oldi.
Shuningdek, Rossiya prezidenti Vladimir Putin 23-mart kuni koronavirusga qarshi vaksinaning birinchi dozasini,14-aprel kuni esa ikkinchi dozasini qabul qildi. Putin Rossiyaning “Sputnik V” vaksinasi bilan emlangan.
Izoh (0)