Shavkat Mirziyoyev 1-sentabr kuni BAA vitse-prezidenti, bosh vaziri, Dubay amirligi hokimi Muhammad ibn Roshid Ol Maktum bilan telefon orqali muloqot qildi, deb xabar bermoqda Prezident matbuot xizmati.
Qayd etilishicha, amirliklar vitse-prezidenti davlat rahbari va O‘zbekiston xalqini mamlakat mustaqilligining 30 yilligi bilan samimiy qutlab, tinchlik-osoyishtalik, farovonlik, katta muvaffaqiyatlar va ravnaq tiladi.
Suhbat davomida ikki tomonlama hamkorlikning dolzarb masalalari muhokama qilindi, 2019-yil mart oyida BAAga oliy darajadagi tashrif yakunlari bo‘yicha erishilgan kelishuvlarning bajarilishi holati ko‘rib chiqildi.
Savdo-iqtisodiy, investitsiyaviy, energetika, transport-kommunikatsiya va boshqa sohalardagi amaliy hamkorlikning natijalari mamnuniyat bilan qayd etildi. Masdar kompaniyasi bilan birgalikda O‘zbekistondagi birinchi quyosh fotoelektr stansiyasi muvaffaqiyatli qurilgani va ishga tushirilgani ta’kidlandi.
Xalqaro va mintaqaviy ahamiyatga molik masalalar yuzasidan ham fikr almashildi.
O‘zbekiston mustaqilligining 30 yilligi munosabati bilan Prezident Shavkat Mirziyoyev nomiga xorijiy davlatlar va hukumatlar, nufuzli xalqaro tashkilotlar rahbarlari, taniqli jamoat va din arboblaridan samimiy qutlovlar kelmoqda.
Xususan, Markaziy Osiyo davlatlarining rahbarlaridan qutlovlar yetib kelgan. Qozog‘istonning birinchi prezidenti Nursulton Nazarboyev, Turkmaniston prezidenti Gurbanguli Berdimuhamedov, Qozog‘iston Prezidenti Qosim-Jo‘mart To‘qayev, Tojikiston prezidenti Emomali Rahmon, Qirg‘iziston prezidenti Sadir Japarov O‘zbekiston xalqiga tinchlik-osoyishtalik, farovonlik va ravnaq tilagan.
Turkiya prezidenti Rajab Toyyib Erdo‘g‘on Ozarbayjon prezidenti Ilhom Aliyev, Hindiston bosh vaziri Narendra Modi, Pokiston bosh vaziri Imron Xon, Janubiy Koreya prezidenti Mun Chje In, Yaponiya bosh vaziri Yosixide Suga, Germaniya prezidenti Frank-Valter Shtaynmayer, Fransiya prezidenti Emmanuel Makron, Yevropa kengashi prezidenti Sharl Misheldan ham bayram tabriklari kelgan.
Mavzuga doir:
Izoh (0)