Eron oliy rahnamosi va diniy yetakchisi 82 yoshli Oyatulloh Ali Xomanaiy mamlakatda ishlab chiqarilgan “Eron Barakat” koronavirusga qarshi vaksinasining birinchi dozasini oldi. Bu haqda rahbarning rasmiy saytiga tayanib “Gazeta.ru” xabar berdi.
Avvalroq Eronda aholini koronavirusga qarshi mahalliy “Eron Barakat” vaksinasi bilan emlash boshlangan edi. 9-iyun kuni Eron hukumati vakili Ali Rabiy respublika sog‘liqni saqlash tizimi Eron vaksinalaridan foydalanish imkoniyatiga ega bo‘lgach, mamlakatda vaksinatsiya dasturi jadal kengayishini aytgan.
Tengrinews xabar berishicha, Qozog‘iston birinchi prezidenti Nursulton Nazarboyev ham koronavirusga qarshi emlandi.
Qayd etilishicha, Nazarboyev Qozog‘istonning Qarag‘anda farmatsevtika zavodida ishlab chiqarilgan “Sputnik V” vaksinasining birinchi komponentini olgan.
Emlanganidan so‘ng Nazarboyev qozog‘istonliklarga sanitariya-epidemiologik xavfsizlik choralarini ko‘rishga va vaksinatsiyada faol bo‘lishga chaqirdi.
“Hozirga qadar Qozog‘istonda uch millionga yaqin odam emlandi. Bugun men ham koronavirusga qarshi vaksina oldim. Men barcha qozog‘istonliklarni vaksinatsiyani faol ravishda davom ettirishga va emlanishdan qo‘rqmaslikka chaqiraman. Virusning yangi shtammlari paydo bo‘layotgani sababli hozirda vaksina olish juda muhim. Bu o‘z sog‘lig‘ingiz uchun kerak. Biz qiyin davrda yashayapmiz. Bularning barchasini birgalikda yengib o‘tishimiz zarur. Hammaga chin dildan sog‘liq va farovonlik tilayman”, — dedi Nursulton Nazarboyev.
Avvalroq Qozog‘iston poytaxti Nur-Sultonda karantin choralari kuchaytirilgani haqida xabar berilgandi. Shuningdek, poytaxtda koronavirusning “hindcha” shtammi qayd etilgan.
Eslatib o‘tamiz, aprel boshida Qozog‘iston prezidenti Qosim-Jo‘mart To‘qayev ham koronavirusga qarshi Qarag‘anda farmatsevtika zavodida ishlab chiqarilgan “Sputnik V” vaksinasi bilan emlangan.
Izoh (0)