Nazarboyev kuyovining neft kompaniyasi qariyb 30 million dollar jarimaga tortildi

Qozog‘istonning Atirau viloyati prokuraturasi “Kaspiy Neft” kompaniyasidan deyarli 13,7 milliard tenge (28,8 million dollardan ortiq) jarima undirdi.

Ma’lum bo‘lishicha, kompaniyaning yakuniy benefitsiari mamlakat birinchi prezidenti Nursulton Nazarboyevning kuyovi Timur Kuliboyevdir.

Aniqlanishicha, “Kaspiy neft” AJ 2021—2022-yillarda konni burg‘ilash va ishlatish natijasida hosil bo‘lgan 4,5 ming tonnadan ortiq xavfli chiqindilarni saqlashga ruxsat olmagan.

Natijada kompaniya Ma’muriy javobgarlik to‘g‘risidagi kodeksning 328-moddasi (atrof-muhitga yo‘l qo‘yiladigan antropogen ta’sir me’yorlarini buzish) bo‘yicha jinoiy javobgarlikka tortilib, 13,7 milliard tenge miqdorida jarimaga tortilgan.

Kompaniyadan olingan mablag‘ Qozog‘iston Milliy jamg‘armasiga yuborilgan.

Qozog‘iston fond birjasi ma’lumotlariga ko‘ra, “Kaspiy Neft” aksiyalarining 100 foizi Joint Resources AJga tegishli bo‘lib, uning aksiyadori Kuliboyev hisoblanadi.

Timur Kuliboyev Nazarboyevning o‘rtancha qizi Dinara Kuliboyevaning turmush o‘rtog‘i hisoblanadi.