7-oktabr kuni Rossiya prezidenti Vladimir Putin 70 yoshini nishonladi. “Dosye” markazi prezident qabulxonasidagi manbasiga tayanib, yubiley uchun taqdim etilgan sovg‘alar haqida ma’lumot berdi.
Qo‘shni mamlakatlar rahbarlaridan sovg‘alar
Rossiya prezidenti o‘z yubileyini Sankt-Peterburgda, eng yaqin qo‘shnilari — Belarus, Tojikiston, O‘zbekiston, Turkmaniston, Ozarbayjon va Armaniston rahbarlari davrasida nishonladi. Ular o‘z sovg‘alarini shaxsan topshirishga muvaffaq bo‘ldi.
Xususan, Tojikiston prezidenti Emomali Rahmon tarvuz va qovunlardan iborat piramida, Belarus rahbari Aleksandr Lukashenko uch quti alkogol, shokolad va pishloq-kolbasadan iborat savat, shuningdek, traktor uchun sertifikat hadya qildi. Turkmaniston prezidenti Serdar Berdimuhamedov yubiley egasiga 30 quti meva, sabzavot va yong‘oqlar taqdim etdi. Ozarbayjon prezidenti Ilhom Aliyev ham oziq-ovqatlardan iborat savat sovg‘a qilgan.
O‘zbekiston prezidenti Shavkat Mirziyoyev Putin bilan uchrashuv chog‘ida aynan qanday sovg‘ani topshirgani noma’lum, biroq Rossiya rahbarining tug‘ilgan kuni arafasida uni oliy darajali “Do‘stlik” ordeni bilan mukofotlagandi.
Rossiya prezidenti ikki mamlakat xalqlari o‘rtasidagi an’anaviy do‘stlik va hamkorlik rishtalarini rivojlantirish hamda tavalludining 70 yillik yubileyi munosabati bilan mukofotlangan.
Chet el yetakchilaridan qanday sovg‘alar keldi?
“Putinni yuzma-yuz tabriklash sharafiga muvaffaq bo‘lmaganlar o‘z qutlovlarini prezident qabulxonasiga yubormoqda”, — deyiladi “Dosye” xabarida.Xususan, Vyetnam prezidenti Nguyen Suan Fuk rossiyalik hamkasbiga ipak bo‘yinbog‘ va o‘rta asrlarga xos Vyetnam kemasining qo‘lda yasalgan yog‘och modelini yuborgan.
Qozog‘iston sobiq prezidenti Nursulton Nazarboyev o‘z profili va dastxati tushirilgan medalyon tuhfa qildi. Unga qo‘shimcha ravishda ikki yetakchi birga tushgan suratlardan iborat albom va shifobaxsh damlamalar to‘plamini jo‘natdi.
XXR yetakchisi Si Szinpin nomidan Xitoy guldoni, damlamalar to‘plami va qayin daraxtlari tasvirlangan va shoyidan ishlangan surat yetib kelgan.
Hindiston bosh vaziri Narendra Modi gullardan yasalgan va hind bayrog‘i ranglariga monand piramida taqdim etdi.
Rossiyalik mansabdorlar ham Putinni sovg‘asiz qoldirmadi
Rossiya Xavfsizlik kengashi raisi o‘rinbosari Dmitriy Medvedev prezident qabulxonasiga misga o‘yib ishlangan Yekaterinoslav noibligining 1792-yilgi xaritasini yubordi. Ushbu noiblik o‘z ichiga janubi-sharqiy Ukrainani olgan, shu jumladan, ayni paytda Rossiya armiyasi egallab olishga urinayotgan Mariupol, Xerson, Poltava, Kremenchug ham unga kirgan.
Shuningdek, Putin Markaziy bank rahbari Elvira Nabiullinadan “Pyotr I — qayta quruvchi” kumush tangasini, “Gazprom” rahbari Aleksey Millerdan Pyotr Birinchi haqidagi kitobni, Tashqi razvedka xizmati direktori Sergey Narishkindan markalar va tilla tangalar to‘plamini, Tergov qo‘mitasi rahbari Aleksandr Bastrikindan qo‘l soatini, bosh prokuror Igor Krasnovdan o‘rog‘liq xatni, Kseniya Sobchakning onasi, senator Lyudmila Narusovadan esa Sibir meteoritidan yasalgan va haqiqiy mamont dandon tishlari bilan bezatilgan mamont haykalini qabul qilib oldi.
Izoh (0)