Buxoro viloyati soliq boshqarmasi “Texno invest gaz” MCHJda tekshiruv o‘tkazib, unga nisbatan asossiz ravishda katta miqdordagi jarimalar qo‘llagan. Bu haqda joriy yil 6-avgust kuni Bosh prokuratura xabar berdi.
Maʼlum qilinishicha, soliqchilar o‘tkazgan audit natijasida korxona soliqqa oid huquqbuzarlik sodir etgan deb topilib, javobgarlikka tortilgan.
Soliq boshqarmasi tadbirkorga naqd pulga sotilgan 2021-yildagi 1,4 milliard so‘mdan ortiq qiymatdagi tovarlar uchun qo‘shilgan qiymat solig‘iga qo‘shimcha 404,3 million so‘m tovon puli hisoblagan. Korxona gardaniga 2022-yil uchun ham ortiqcha 42,8 million so‘m kompensatsiya to‘lovi ilingan. Shu bilan birga, tadbirkorlik subyektiga nisbatan yashirilgan soliq bazasining 20 foizi, yaʼni 375,1 million so‘m miqdorida jarima qo‘llanilgan.
Keyin korxona soliq idorasining yuqoridagi qarorini haqiqiy emas deb topish bo‘yicha maʼmuriy sudga ariza bilan murojaat qilgan. Sud tomonidan arizani qanoatlantirish rad etilgan. Shundan so‘ng, “Texno invest gaz” MCHJning arizasiga asosan, Bosh prokuratura tomonidan mazkur sud qarorlari qonuniyligi o‘rganilgan. Soliq organi tomonidan tekshirish davrida tadbirkorlik subyektiga asossiz qo‘shimcha soliqlar qo‘llanilgani maʼlum bo‘lgan.
“Shunga ko‘ra, Bosh prokuraturaning sud qarorlariga nisbatan keltirgan protesti Oliy sud tomonidan qanoatlantirilib, tadbirkorlik subyektining buzilgan huquqlarini tiklash taʼminlandi”, deyiladi manba xabarida.
Maʼlum qilinishicha, Bosh prokuratura tomonidan sud qarorlari qonuniyligini o‘rganish ishlari faol davom ettirilyapti.
Avvalroq Qashqadaryoda tadbirkorga elektr tokidan 185 million so‘m asossiz qarz yozilgani xabar qilingandi. Raqobat qo‘mitasi tadbirkor huquqi himoya etilib, asossiz yozilgan qarzdorlik hisobdan chiqarilishi taʼminlanganini bildirgan.
Izoh (0)