Qozog‘istonda tavalludiga 80 yil to‘ladigan Olmaota shahrining sobiq hokimi, siyosatchi Zamanbek Nurqadilovga haykal o‘rnatiladi. Bu haqda uning qizi Quralay Nurqodilova ma’lum qildi, deb yozmoqda “Orda.kz”.
Yodgorlik Nurqadilov tug‘ilib o‘sgan Kegen qishlog‘ida (Olmaota viloyati) o‘rnatilishi kutilmoqda. Bundan tashqari, maktabga uning nomi beriladi, siyosatchi Olmaotada yashagan uyga yodgorlik lavhasi osiladi. Prezident Qosim-Jo‘mart To‘qayev imzolagan tegishli maktubni uning matbuot kotibi Berik Uali Nurqadilov sharafiga tashkil etilgan xotira ziyofatida o‘qib eshittirdi.
“Zamanbek Kalabayevich istiqlol tongida ko‘plab mas’uliyatli vazifalarni bajargan fuqaro. Uning mustaqillikni qaror toptirish, hududlar ravnaqiga qo‘shgan salmoqli hissasini inkor etib bo‘lmaydi. Xalq o‘g‘lonlari nomlarini ulug‘lash va ularning mehnatiga munosib baho berish avlodlarning burchidir”, — deya davlat rahbarining so‘zlaridan iqtibos keltirgan Qozog‘iston OAV.
Muxolifatchi oilasiga maktublarni Senat raisi Maulen Ashimbayev, parlament raisi Erlan Koshanov, Olmaota hokimi Erbolat Dosayev va Olmaota viloyati hokimi Marat Sultongaziyev yuborgan.
Zamonbek Nurqadilov Olmaota shahrining birinchi hokimi bo‘lgan, Favqulodda vaziyatlar vaziri lavozimida ishlagan va birinchi prezident Nursulton Nazarboyevning eng yaqin safdoshlaridan biri hisoblangan. Biroq 2004-yilning mart oyida u kutilmaganda hokimiyatga qarshi chiqdi, davlat rahbari siyosatini keskin qoraladi va vazirlik lavozimidan chetlashtirildi. Shundan so‘ng u mamlakat rahbariyatining va shaxsan Nazarboyevning murosasiz tanqidchisiga aylandi.
“Kommersant” gazetasining yozishicha, Nurqodilov Qozog‘istonda Korrupsiya bo‘yicha xalqaro tergov byurosini tashkil qilgan va qo‘lida prezident Nazarboyev va uning ko‘plab sheriklari tomonidan sodir etilgan korrupsiya jinoyatlari haqida dalillar borligini bir necha bor ta’kidlagan. U mazkur ayblovchi dalillarni xorij banklarining seyflarida saqlaganini aytib, vaqti kelganda ommaga e’lon qilishga va’da bergan.
2005-yil 12-noyabrda Nurqodilov Olmaotadagi uyida o‘lik holda topildi, unga uchta o‘q – biri boshiga, ikkitasi ko‘kragiga tekkan edi. Uning o‘limi rasmiy sababi o‘z joniga qasd qilish deb aytildi. Siyosatchining sheriklari qotillikni da’vo qilishdi. Ish 2006-yilning noyabrida yopildi.
Zamonbek Nurqadilovga haykal o‘rnatilishi haqidagi xabar Ostonadagi Nursulton Nazarboyev haykali demontaj qilinganidan bir necha kun o‘tib paydo bo‘ldi. Birinchi prezident haykali Milliy mudofaa universiteti hududidan olib tashlandi. Hozirda haykal Mudofaa vazirligi binolaridan birida saqlanmoqda, kelajakda uni Qozog‘iston Respublikasi Qurolli Kuchlari Davlat harbiy tarixi muzeyi binosiga ko‘chirish rejalashtirilgan.
Izoh (0)