Bugun, 17-may kuni Qozog‘iston prezidenti Qosim-Jo‘mart To‘qayev 70 yoshga to‘ldi. Ommaviy axborot vositalarida Qozog‘iston prezidentining noyob arxiv fotosuratlari chop etilmoqda.
Qozog‘iston prezidenti matbuot kotibi Ruslan Jeldibay mamlakatda bayram tadbirlari rejalashtirilmaganini, chunki To‘qayev tug‘ilgan kunini hech qanday tarzda nishonlamasligini ma’lum qilgandi. U bugun Xitoyga ish safari bilan jo‘nab ketadi va Sian shahrida bo‘lib o‘tadigan “Xitoy – Markaziy Osiyo” sammitida ishtirok etadi.
Qosim-Jo‘mart To‘qayev 1953-yil 17-mayda Olmaota shahrida tug‘ilgan.
Qozog‘iston prezidenti noodatiy tarzda ikki ismga ega. Uning o‘zi “Ota haqida so‘z” kitobida aytganidek, amakisining sharafiga unga Qosim ismini berishgan, onasi esa unga Jo‘mart deb nom qo‘ygan. Qosim-Jo‘mart ismi tarjimada “ajoyib” va “olijanob” ma’nolarini bildiradi.
.jpg)
Otasi — Kemel To‘qayev (1923—1986) Ikkinchi jahon urushi qatnashchisi, taniqli yozuvchi, qozoq adabiyotida detektiv-sarguzasht janrining asoschisi. Onasi — Turar Shabarboyeva (1931—2000) esa Olmaota chet tillar pedagogika institutida ishlagan.
To‘qayev Ilyos Yesenberlin nomidagi 25-sonli gimnaziyada o‘qigan. 1975-yilda Moskva davlat xalqaro munosabatlar institutini tamomlagan va SSSRning Xitoydagi elchixonasida bitiruv oldi amaliyotini o‘tagan.
Qozog‘iston rahbari beshta tilni biladi: qozoq, rus, ingliz, xitoy va fransuz.
1975-yilda To‘qayev SSSR Tashqi ishlar vazirligida ishlay boshlagan. U Singapurdagi Sovet elchixonasiga ishga yuborilgan. 1979-yilda SSSR Tashqi ishlar vazirligi apparatiga qaytgan. 1984—1985-yillarda SSSR Tashqi ishlar vazirligida ishlagan, keyin Xitoydagi Sovet elchixonasiga yuborilgan va 1991-yilgacha ikkinchi kotib, birinchi kotib va maslahatchi lavozimlarida ishlagan.
Qosim-Jo‘mart To‘qayev shuningdek, Birlashgan Millatlar Tashkiloti bosh kotibi o‘rinbosari va BMTning Jenevadagi Yevropa bo‘limi bosh direktori, Qozog‘iston bosh vaziri, tashqi ishlar vaziri, mamlakat parlamenti Senati spikeri lavozimlarida ishlagan.
To‘qayev diplomatik unvonga (Favqulodda va muxtor elchi) va ilmiy darajaga (siyosiy fanlar doktori) ega. Shuningdek, u xalqaro munosabatlarga oid qator asarlar muallifi, turli mamlakatlar universitetlari, jumladan, Rossiya Tashqi ishlar vazirligi Diplomatik akademiyasi va Xitoyning Shenchjen universitetining faxriy professori.
Qozog‘iston birinchi prezidenti Nursulton Nazarboyev iste’foga chiqqanidan keyin To‘qayev davlat rahbari bo‘ldi va 2019-yil 20-mart kuni qasamyod qildi. O‘sha yilning iyun oyida bo‘lib o‘tgan navbatdan tashqari prezidentlik saylovlarida Qosim-Jo‘mart Kemelovich g‘alaba qozondi.
Izoh (0)