Google foydalanuvchilarining ma’lumotlari xakerlar tomonidan amalga oshirilgan muvaffaqiyatli hujum oqibatida o‘g‘irlanganini tan oldi. Hujum kompaniyaning ma’lumotlar bazasiga ta’sir o‘tkazgan. Bu haqda Forbes nashri xabar berdi.
Manbaga ko‘ra, bu qandaydir texnik nosozlik emas, aynan xakerlik hujumi bo‘lgan. Hujum 2025-yilning iyun oyida sodir bo‘lgan.
Google Threat Intelligence Group 2025-yil 5-avgust kuni ijtimoiy tarmoqlarda post e’lon qilgan. Unda kompaniyaning ma’lumotlar bazalaridan biriga ShinyHunters nomi bilan tanilgan xakerlar guruhi (rasmiy nomi: UNC6040) hujum qilgani tasdiqlangan.
“Google mazkur faoliyatga javob qaytardi, hujumning ta’siri tahlilini amalga oshirdi va zararni kamaytirish choralarini boshladi,” deyiladi kompaniya postida.
Ta’kidlanishicha, hujumga uchragan ma’lumotlar ombori kichik va o‘rta bizneslar uchun aloqa ma’lumotlarini, shuningdek, tegishli eslatmalarni saqlashda ishlatiladigan Salesforce bazasi bo‘lgan.
Google xabariga ko‘ra, xakerlar qulay va qisqa vaqt ichida mijozlar ma’lumotlarini qo‘lga kiritishga muvaffaq bo‘lgan. Google hozircha hujum tafsilotlari bo‘yicha ko‘p ma’lumot bermagan bo‘lsa-da, o‘g‘irlangan ma’lumotlar jamoatchilikka ochiq bo‘lgan kompaniya nomlari va aloqa ma’lumotlari ekanini tasdiqlagan.
Kompaniya ma’lumotiga ko‘ra, ShinyHunters foydalanuvchilarning shaxsiy ma’lumotlarini qo‘lga kiritgach, 72 soat ichida bitkoin tarzidagi to‘lovlarni talab qiluvchi xatlar va qo‘ng‘iroqlar taktikasidan foydalanadi. Ushbu holatda aynan shu usul qo‘llanganiga doir tasdiq yo‘q.
Closed Door Security kompaniyasi bosh direktori Uilyam Raytning so‘zlariga ko‘ra, Google kabi gigant kompaniyaning xakerlik hujumiga uchrashi, dunyoda hech bir tashkilot kiberjinoyatlardan himoyalanmaganini ko‘rsatadi.
“Agar Google ShinyHunters hujumlarining to‘lqinida ma’lumotlar bazasining xavfsizligi bilan bog‘liq muammolarga duch kelgan bo‘lsa, bu hech bir tashkilot kiberjinoyatdan himoyalanmaganini ko‘rsatadi. Siz kichik korxona bo‘lasizmi yoki dunyodagi yetakchi texnologik kompaniyami — farqi yo‘q, barcha tashkilotlar zaif hisoblanadi,” degan Rayt.
Izoh (0)