Qozog‘iston sobiq prezidenti Nursulton Nazarboyevning haykali Qozog‘iston Milliy muzeyidan olib tashlandi. Bu haqda Orda.kz xabar berdi.
“2014-yildan beri yangilanmagan “Mustaqil Qozog‘iston” zalini reekspozitsiya qilish ishlari boshlandi. Bu yerda joriy tarixiy davrning muhim voqealari to‘liq yoritiladi. Yodgorlikka kelsak, ushbu eksponat muzey mulki hisoblanadi va zal konsepsiyasidagi o‘zgarishlar tufayli muzey fondida saqlab qolinadi”, — deyiladi muzey xabarida.
Bundan tashqari, muzeyning 10 yilligini nishonlash doirasida Madaniyat vaziri topshirig‘iga ko‘ra mahalliy va xorijlik mutaxassislarni jalb etgan holda muzey makonini obodonlashtirish jarayoni boshlanganini ta’kidladilar.
“Jahon muzey amaliyotiga ko‘ra, har bir muzey o‘z ko‘rgazma zallarining konseptual mazmuni va badiiy-stilistik dizaynini vaqti-vaqti bilan yangilab turishi shart. Ushbu amaliyotni qo‘llagan Milliy muzey atriumni o‘zgartirishni boshladi, uning asosiy vazifasi funksionallikni ta’minlashdir”, — deyiladi xabarda.
Muzeyga ekskursiyalar aynan Nursulton Nazarboyev haykali olib tashlangan atriumdan boshlanadi. Bu yerda Milliy muzey, uning fond kolleksiyalari va ko‘rgazma zallari haqida ham tanishtiruvchi maʼlumotlar beradi.
Eslatib o‘tamiz, yanvar oyi boshida Ostonadagi Milliy mudofaa universitetidan Nursulton Nazarboyev haykali olib tashlangan edi. Keyinchalik uning portreti Olmaotadagi Olmali metro bekatidan demontaj qilindi.
Izoh (0)