Shavkat Mirziyoyev 6-iyul, seshanba kuni Qozog‘istonning birinchi prezidenti — elboshi Nursulton Nazarboyev bilan telefon orqali muloqot qildi.
Prezident matbuot xizmatining xabar berishicha, davlat rahbari suhbat avvalida 81 yoshga to‘lgan Nursulton Nazarboyevni tug‘ilgan kuni bilan samimiy tabriklab, unga mustahkam sog‘liq, baxt-saodat va katta muvaffaqiyatlar, birodar Qozog‘iston xalqiga tinchlik-osoyishtalik va ravnaq tiladi.
Nursulton Nazarboyevning zamonaviy Qozog‘istonni barpo etish va mamlakatning xalqaro maydondagi nufuzini oshirishdagi alohida o‘rni, O‘zbekiston—Qozog‘iston yaxshi qo‘shnichilik va strategik sheriklik munosabatlarini mustahkamlash hamda mintaqada barqarorlik va izchil taraqqiyotni ta’minlashga qo‘shayotgan katta hissasini alohida qayd etdi.
Suhbat davomida O‘zbekiston va Qozog‘iston o‘rtasidagi ko‘p qirrali hamkorlikning dolzarb masalalari muhokama qilingan. Savdo, sanoat, qishloq xo‘jaligi, transport va logistika, turizm sohalaridagi ustuvor loyihalarni, madaniy-gumanitar sohadagi qo‘shma dasturlarni ilgari surish muhim ekani ta’kidlangan.
Shuningdek, mintaqaviy kun tartibi, eng avvalo, Afg‘onistonda keskinlashayotgan vaziyat yuzasidan ham fikr almashilgan. Bo‘lajak ikki va ko‘p tomonlama tadbirlar rejasi, shu jumladan, Qozog‘istonning birinchi Prezidenti faxriy raislik qilayotgan Markaziy Osiyo davlatlari rahbarlarining navbatdagi Maslahat uchrashuvini o‘tkazish masalasi ham ko‘rib chiqilgan.
Bundan avval Shavkat Mirziyoyev Rossiya prezidenti Vladimir Putin, Turkmaniston prezidenti Gurbanguli Berdimuhamedov, Tojikiston prezidenti Emomali Rahmon bilan telefon orqali muloqot qilib, turli masalalarni, xususan, Afg‘onistonning shimoliy hududlaridagi vaziyatni muhokama qilgandi.
Izoh (0)