Qozog‘iston Respublikasi Tashqi ishlar vazirligi Belarus rahbari Aleksandr Lukashenko Qozog‘iston sobiq prezidenti Nursulton Nazarboyev bilan ikki davlat o‘rtasidagi aloqalarni muhokama qilganini tanqid qildi. Bu haqda KazTAG xabar berdi.
Bayonotga ko‘ra, faqat amaldagi davlat rahbari — Qosim-Jo‘mart To‘qayev bilan Respublika bilan munosabatlarni muhokama qilish mumkin.
“Biz bu maʼlumotlarni ko‘rib chiqdik. Tabiiyki, Belarus prezidenti sobiq prezidentimizning uzoq yillik hamkasbi, ularda doim gaplashishga arzirli mavzu bor. Shu bilan birga, ma’lumki, mamlakatimizning tashqi siyosatini, jumladan, xorijiy davlatlar bilan munosabatlarini belgilash Qozog‘iston Respublikasi prezidentining vakolatidir.
Shuning uchun Qozog‘iston—Belarus munosabatlarini faqat hozirgi davlat rahbarlari o‘rtasida muhokama qilish mumkinligidan kelib chiqamiz. Aytish joizki, Belarus bilan munosabatlarimiz strategik xususiyatga ega, kun tartibida hech qanday muammoli masala yo‘q, barcha darajalarda doimiy va xilma-xil aloqalar qo‘llab-quvvatlanmoqda”, — deydi TIV rasmiy vakili Aybek Smadiyarov.
Eslatib o‘tamiz, 25-iyun kuni Belarus prezidenti matbuot xizmati Lukashenko Nazarboyev bilan Belarus—Qozog‘iston munosabatlarini muhokama qilgani haqida xabar bergandi.
Izoh (0)