Ostonada Qozog‘iston birinchi prezidenti kutubxonasi va Nursulton Nazarboyevning ish qarorgohi bo‘lgan binoda prezidentlik markazi tashkil etildi, deb xabar bermoqda Tengrinews.
Yangi tuzilma “mustaqil Qozog‘iston rahbarlarining tarixiy merosini saqlash, o‘rganish va targ‘ib qilish” bilan shug‘ullanadi. Unga Nazarboyevning shaxsiy arxivi va shaxsiy kutubxonasi materiallari, shuningdek, ilgari birinchi prezident kutubxonasida saqlanayotgan muzey eksponatlari topshirilgan. Vaqt o‘tishi bilan amaldagi davlat rahbari Qosim-Jo‘mart To‘qayevning “tarixiy va madaniy qadriyatga ega” shaxsiy hujjatlari va buyumlari yangi markazga o‘tkaziladi. Kelgusida bu yerda Qozog‘istonning keyingi prezidentlariga tegishli materiallar to‘planishi rejalashtirilgan.
“Shu bilan birga, markaz faoliyati faqat muzey va kutubxona funksiyalari bilan cheklanib qolmaydi. Bu Qozog‘iston jamiyatini tashvishga solayotgan eng dolzarb masalalarni muhokama qilish uchun yetakchi ekspert maydonchasiga aylanishi ko‘zda tutilgan”, — ta’kidladi prezident ma’muriyati.
Yangi markaz hamma uchun ochiq, kirish esa bepul bo‘ladi.
Qozog‘istonning sobiq rahbari Nursulton Nazarboyev 2019-yil bahorida iste’foga chiqishini e’lon qilganidan so‘ng Akordadan kutubxona binosiga ko‘chib o‘tgandi. U yerda birinchi prezident kanselyariyasi ham faoliyat yuritgan. O‘tgan yilning yozida moliya vaziri Erulan Jamaubayev kutubxona tez orada faoliyatini to‘xtatishini aytgandi.
2022-yil yanvardagi tartibsizliklardan keyin Nursulton Nazarboyev mamlakatning ichki va tashqi siyosatidagi ishtirokini deyarli to‘xtatdi. 2023-yil boshida Nazarboyev kafolat va imtiyozlardan, shuningdek, barcha faxriy maqomlardan, jumladan, Elboshi (millat yetakchisi) maqomlaridan ham mahrum etildi.
Uning bir qator oila a’zolari va unga yaqin kishilar jinoiy javobgarlikka tortildi, boshqalari davlat lavozimidan ayrildi. 2019-yilda Nazarboyev sharafiga Nur-Sulton deb atalgan mamlakat poytaxti avvalgi nomi – Ostonaga qaytdi.
Izoh (0)