АҚШ президенти Дональд Трамп Россия ва Украина ўртасидаги можаро мисолида учувчисиз қурилмаларнинг замонавий уруш қиёфасига сезиларли таъсирини кўрсатди. Бу ҳақда у Pod Force One подкастида маълум қилди.
“Биз тўхтатишга ҳаракат қилаётган Россия ва Украина ўртасидаги даҳшатли урушга эътибор берсангиз, бу учувчисиз қурилмалар уруши эканини кўрасиз”, деди у.
Трампнинг қўшимча қилишича, дронлар ўзини тезкор ва ақлли тизим сифатида намоён этган ва уч йил олдин ҳеч ким уларнинг жанг майдонида шунчалик таъсирли бўлишини тасаввур ҳам қила олмас эди.
“Учувчисиз қурилма бу қадар кучли қурол бўлишини ким ўйлаган? Аммо у кўплаб бошқа турдаги қуролларни, ҳатто самолётларни ҳам ўрнини босмоқда”, деди АҚШ президенти.
“Ўргимчак тўри” операцияси
Украина Хавфсизлик хизмати 1 июнь куни Россиянинг бешта авиация базаларига қарши кенг кўламли махсус операция ўтказди. Унинг мақсади Россия стратегик авиациясини, хусусан, Украина шаҳарларига мунтазам равишда ҳужум қилган қанотли ракета ташувчиларини ишдан чиқариш эди.
Операция бир ярим йилдан кўпроқ вақт давомида тайёрланган ва пухта режалаштирилган. Ҳужумлар Россияда тўхтаб турган юк машиналаридан учиб чиққан дронлар ёрдамида амалга оширилган. Бу эса Украина чегарасидан узоқ масофада зарбалар беришга имкон берган.
АҚШ разведкаси маълумотларига кўра, етказилган зарар “сезиларли” бўлган, бироқ унинг кўлами ҳали баҳоланмоқда Оқ уйдаги манбалар ҳужумлар натижасида Россия камида олтита узоқ масофали “Ту-95”, камида тўртта “Ту-22М” бомбардимончи самолётларини, шунингдек, ҳар бири 300 миллион доллар қийматидаги бир нечта “А-50” радиолокацион назорат самолётларини йўқотганини маълум қилган.
Ғарб экспертлари фикрича, бу операция урушда бурилиш нуқтаси бўлиши мумкин ва Украинанинг Россиянинг стратегик объектларига зарба бериш қобилиятини намойиш этади. Операцияга 117 та дрон жалб қилинган. Улар Россиянинг стратегик қанотли ракета ташувчиларининг 34 фоизини йўқ қилган.
Зеленский операциянинг “офиси” Россия вилоятларидан бирида Федерал хавфсизлик хизмати бошқармаси ёнида жойлашганини айтган. Украина президенти “ноёб операция” учун хавфсизлик хизмати ходимларига миннатдорлик билдирган.
Изоҳ (0)