Россия қўшинлари 25 майга ўтар кечаси Украинага дронлар ва ракеталар билан энг йирик авиазарбани амалга оширди. Мазкур авиаҳужумга 298 та дрон жалб этилди. АҚШ президенти Дональд Трамп бунга муносабат билдириб, россиялик ҳамкасби Владимир Путинни кескин танқид қилди.
Мен ҳар доим Владимир Путин билан жуда яхши муносабатда бўлганман, лекин унга нимадир бўлган. У бутунлай ақлдан озибди! У бекордан бекорга кўп одамларни ўлдиряпти, мен фақат ҳарбийлар ҳақида гапираётганим йўқ. Ракеталар ва дронлар ҳеч қандай сабабсиз Украина шаҳарлари бўйлаб учирилмоқда, деди Трамп.
АҚШ раҳбари Путин бутун Украинани босиб олмоқчи экани, бироқ бу “Россиянинг қулашига олиб келиши”ни таъкидлади. Трамп ўз баёнотида украиналик ҳамкасби Владимир Зеленскийни ҳам танқид қилди.
Худди шундай, президент Зеленский ҳам ўз сўзлари билан мамлакатига ҳеч қандай фойда келтирмаяпти. Унинг оғзидан чиққан ҳар бир сўз муаммо келтириб чиқаради, бу менга ёқмайди ва тўхташи керак. Агар мен президент бўлганимда, бу уруш ҳеч қачон бошланмаган бўларди. Бу Зеленский, Путин ва Байденнинг уруши, Трампники эмас. Мен фақат қўпол лаёқатсизлик ва адоват туфайли келиб чиққан катта ва даҳшатли ёнғинларни ўчиришга ёрдам беряпман, холос, деди Трамп.
Россия қўшинлари 25 майга ўтар кечаси Украина ҳудудига 300 га яқин дрон ва 70 та ракета учирди. Оқибатда 12 киши ҳалок бўлди, 60 дан ортиқ киши яраланди. 13 та ҳудуд зарба остида қолган: Киев ва Киев вилояти, шунингдек, Житомир, Хмелницкий, Тернопол, Днепропетровск, Николаев, Одесса, Харьков, Чернигов, Черкасс, Суми ва Полтава вилоятлари.
Изоҳ (0)