АҚШ президенти Дональд Трамп зарурат туғилганда Россия ва Украина президентлари Владимир Путин ва Владимир Зеленский билан уч томонлама учрашув ўтказишга тайёр эканлигини маълум қилди. У бу ҳақда Оқ уйда журналистлар билан учрашувда билдирди.
Трампдан “ҳозирда Путин чиндан ҳам урушни тугатмоқчи, деб ўйлайсизми?”, деб сўрашди. У саволга жавоб бераркан АҚШ президентининг махсус вакили Стив Уиткофф Россия томони билан “жуда қатъий” муносабатда бўлаётганини таъкидлади. Шунингдек, Оқ уй раҳбари икки ҳафтадан сўнг Путин ҳақиқатан ҳам урушни тугатмоқчи ёки йўқлигини “маълум қилишини” ваъда берди.
“Буни сизларга айтолмайман, лекин тахминан икки ҳафтадан кейин хабар бераман. Тез орада у [Putin] бизни бирор нарсага ундаяптими ёки йўқлигини билиб оламиз - агар шундай бўлса, биз бир оз бошқача йўл тутамиз”, деди АҚШ президенти.
Трамп “бир неча кун олдин, музокаралар деб аталаётган жараён давомида одамлар ўлдирилгани” туфайли “ҳафсаласи пир бўлганини” таъкидлади.
АҚШ раҳбари нима учун ҳамон Россияга қарши санкциялар жорий этмагани ҳақидаги саволга Трамп эҳтимолий тинчлик келишувига халақит бермаслик учун эканлигини айтиб, зарур бўлса Зеленский ва Путин билан учрашишини қўшимча қилган.
Америка раҳбарининг сўзларига кўра, Оқ уй ҳозирда АҚШ ва Россия президентларининг шахсий учрашувини ташкил этиш устида ишламоқда.
Ушбу босқичда биз президент Путин билан учрашув устида ишламоқдамиз. Ишлар қандай ривожланишини кўрамиз. Менимча, ҳаммаси яхши, аммо кўрамиз, деди Дональд Трамп.
Бундан аввал Россия президенти ёрдамчиси Юрий Ушаков АҚШ президенти Дональд Трампнинг россиялик ҳамкасби Владимир Путинга нисбатан баёнотлари Оқ уй раҳбари Россия-Украина можаросидаги ҳақиқий аҳвол ҳақида етарлича маълумотга эга эмаслиги юзасидан ўз муносабатини билдирганди.
Изоҳ (0)