Ўзбекистон ТИВ Москвадаги рейдда куч ишлатар тузилмаларнинг мигрантларга нисбатан ҳаракатлари юзасидан Россияга нота юборганди. Россия ТИВ ахборот хизмати раҳбари Мария Захарова ушбу нотадаги маълумотлар диққат билан ўрганилаётганини маълум қилди.
“Россия томони Ўзбекистон нотасидаги маълумотларни диққат билан кўриб чиқмоқда ва ўзбекистонлик ҳамкорларнинг тегишли сўрови ваколатли органларга етказилади. Олинган объектив маълумотлар белгиланган тартибда Тошкентга юборилади”, дея унинг сўзларини келтирмоқда “ТАСС”.
У ҳуқуқ-тартибот ва бошқа хизматлар орқали тўғридан-тўғри алоқа каналлари мавжудлигини, иттифоқчилар ўртасидаги анъанага кўра, суҳбат самимий бўлиб, ҳар қандай сигнал синчковлик билан кўриб чиқилишини билдирди.
“Ўзбекистон билан мустаҳкам иттифоқчилик ва ҳар томонлама стратегик шериклик муносабатлари мавжудлигини ва икки томонлама муносабатларимизнинг барча мавзуларига шу нуқтаи назардан ёндашишимизни таъкидламоқчимиз”, дея қўшимча қилган Захарова.
8 июнь куни Москванинг Соколники туманида ўтказилган текширув тадбирлари чоғида Россия ҳуқуқни муҳофаза қилувчи органлари (ОМОН) томонидан ушбу давлатда вақтинча меҳнат фаолиятини олиб бораётган хориж фуқароларига нисбатан жисмоний куч қўлланилганди. Миграция агентлигининг Россиядаги ваколатхонаси жабрланганлар орасида Ўзбекистон фуқаролари бўлса, жумладан, уларга тан жароҳатлари етказилган, ҳуқуқлари бузилган ёки бошқа муаммоларга дуч келган бўлса, мурожаат қилишни сўраганди.
Ўзбекистон ТИВ томонидан юборилган нотада Россия ТИВдан ушбу ҳолатга изоҳ бериш ҳамда инсон ҳуқуқлари яққол бузилганлиги акс этганлиги, бу эса қабул қилиб бўлмас ҳолатлиги таъкидланиб, куч ишлатар ташкилот вакилларининг ҳаракатларига ҳуқуқий баҳо бериш сўралган.
2025 йил апрель ойи охирларида Россияда ўзбек мигрантлари ҳуқуқларига риоя этилиши назорати кучайтирилиши маълум қилинганди. Икки давлат Бош прокуратуралари мигрантларнинг ҳуқуқларига риоя этилиши устидан назорат ва кузатувни кучайтириш мажбуриятини олганди.
Изоҳ (0)