Россия 11 июнга ўтар кечаси 17 та Shahed типидаги ҳужумчи дронлар билан Харьковга ҳужум қилди. Бу ҳақда “Украинска правда” хабар берди.
Слободский ва Основянский туманларига уюштирилган оммавий ҳужум оқибатида 2 киши ҳалок бўлган, 54 киши яраланган, улардан 8 нафари болалар. Хусусан, 2 ёшли қиз ва 15 ёшли ўғил бола шифохонага етказилган. Ёнғин ичида қолган хонадонлардан бир неча киши қутқарилган. Маълум қилинишича, ҳужум 00:31 да бошланган ва 00:40 гача давом этган.
Кўп қаватли турар жой бинолари, хусусий уйлар, болалар майдончалари, жамоат транспорти ва саноат объектларига тўғридан тўғри зарбалар берилгани айтилган. Ҳодиса оқибатида турар жой хонадонларида ёнғинлар содир бўлган, биноларнинг томлари вайрон бўлган, автомобиллар ёниб кетган, портлаш тўлқинидан деразалар парчаланиб кетган. Шунингдек, троллейбуслар, ҳаво линиялари, коммунал ва саноат объектлари шикастланган.
Слободской туманида душман дронлари троллейбус депосига ҳужум қилгани қайд этилган. 9 нафар жабрланувчи касалхонага ётқизилган.
6 июнь куни ҳам Харьковга ҳужум уюштирилган эди. Ҳодиса оқибатида 4 киши ҳалок бўлган, 60 га яқин киши яраланган. Тахминан 18 та кўп қаватли уй ва яна 13 та уйга зарба берилган. Жабрланганлар орасида чақалоқ ва 14 ёшли қиз ҳам бор, дея қўшимча қилинган.
Шунингдек, Россиянинг Украина жанубидаги Херсонга берган зарбалари оқибатида 2 киши ҳалок бўлганди. Шаҳарга 48 та дрон, 2 та ракета ва 4 та қанотли бомба ташланган. 7 июнь куни эса яна қанотли бомбалар ташлангани маълум қилинганди.
5 июнга ўтар кечаси эса Россия мамлакатга 400 дан ортиқ дрон ва 40 га яқин ракета билан ҳужум қилганида Украина бўйлаб 6 киши ҳалок бўлган ва 80 киши яраланганди.
Изоҳ (0)