Рим папаси Лев XIV Ватиканда Россия ва Украина музокараларини ўтказишга розилик билдирди. Бу ҳақда Италия ҳукумати хабар бермоқда.
Маълум қилинишича, Италия бош вазири Жоржа Мелони понтифик билан телефон орқали суҳбатлашиб, “Украинада адолатли ва барқарор тинчлик ўрнатиш” учун зарур бўлган қадамларни муҳокама қилган. У Лев XIV нинг “очиқкўнгиллилиги ва тинчликка бўлган қатъий садоқати” учун миннатдорлик билдирган.
Илгари ҳам Рим папаси Ватиканни Россия ва Украина ўртасидаги музокаралар учун жой сифатида таклиф этган эди. Шу билан бирга, у музокараларда воситачи бўлишга тайёр эмаслигини таъкидлаган.
19 май куни АҚШ президенти Дональд Трамп Владимир Путин билан телефон орқали суҳбатлашгандан сўнг, понтифик музокаралар ўтказишдан манфаатдор эканини алоҳида таъкидлади.
Конклав 8 май куни Лев XIV ни Римнинг янги папаси этиб сайлади. Якшанбадаги илк мурожаатида у Украинада тинчлик ўрнатишга чақирди:
“Мен қалбимда азиз украин халқининг азоб-уқубатларини ҳис қиламан. Иложи борича тезроқ ҳақиқий, адолатли ва барқарор тинчликка эришиш учун барча имкониятлар ишга солинсин” деди у.
Истанбул музокаралари
10 май куни Украина президенти Владимир Зеленский Киевда Европанинг тўрт давлати раҳбарларини қабул қилди. Саммит якунида улар қўшма баёнот қабул қилиб, унда Россиядан камида 30 кун давомида сўзсиз ўт очишни тўхтатишни талаб қилди ва янги санкциялар билан таҳдид солди.
Орадан бир неча соат ўтиб, 11 майга ўтар кечаси Россия президенти Владимир Путин Кремлда журналистларни тўплаб, Истанбулда 2022 йил баҳорида тўхтаб қолган музокаралар 15 майдан бир томонлама тартибда қайта тикланишини эълон қилди.
Шундан сўнг Зеленский Туркияга келишини, лекин фақат Путин билан музокара олиб боришини айтди. Кремль 14 майга ўтар кечаси Россия делегацияси таркибини эълон қилди. Унга Мединский бошчилик қилди.
Россия делегацияси 15 май куни эрталаб Истанбулга учиб келди. Шу куни тушдан кейин Владимир Зеленский Украина расмийлари билан бирга Туркия раҳбари Ражаб Тоййиб Эрдўғон билан музокаралар ўтказиш учун Анқарага учиб келди. Уч соатга яқин давом этган учрашувдан сўнг Зеленский Умеров бошчилигидаги Украина делегациясини музокараларда иштирок этиш учун Истанбулга юборишга розилигини билдирди.
Истанбулда 16 май куни Россия ва Украина делегациялари ўртасида 2022 йил баҳоридан бери биринчи музокаралар ўтказилди. Томонлар ўт очишни тўхтатиш бўйича келишувга эриша олмади, аммо энг йирик асирлар алмашинувини амалга оширишга келишиб олди.
Изоҳ (0)