Украина президенти Владимир Зеленский Украина ойига 27 минг кишини, Россия эса 40-50 минг кишини сафарбар қила олишини маълум қилди, чунки уларнинг йўқотишлари кўпроқ. Бу ҳақда у Венгриянинг Válasz Online нашрида берган интервьюсида айтиб ўтган.
“Ҳар қандай урушда сафарбарлик муаммо ҳисобланади. Украина ҳам бундан мустасно эмас, чунки биз уруш тугашини хоҳлаймиз. Одамлар чарчайди. Биз ойига 27 минг кишини, россияликлар эса 40-50 минг кишини сафарбар қила оламиз, чунки уларнинг йўқотишлари кўпроқ. Бизда ҳарбий ҳолат туфайли сафарбарлик имконияти бор. Путинни тўхтатиш бўйича бошқа ҳеч кимда тажриба йўқ. Айнан биз уни тўхтатдик”, деди Зеленский.
Баъзи давлатлар раҳбарларининг Украинада 18 ёшдан бошлаб сафарбарлик ўтказиш ҳақидаги фикрларига муносабат билдирган Зеленский буни қилиш керак деб ҳисобламаслигини таъкидлаган.
“Ўргимчак тўри” операцияси шуни кўрсатдики, энг муҳими одамлар сони эмас, қурол ва технология. Шунингдек, пул ва босим ҳам муҳим. Санкциялар эса айнан руслар урушни молиялаштираётган маблағларга қаратилган бўларди”, дея тушунтирди Зеленский.
Унинг сўзларига кўра, ғарблик ҳамкорлар Украина 18 ёшдан ошган шахсларни сафарбар қилмагани учун санкциялар қўллаш тўғрисида қарор қабул қилмаганликларининг сабабларини санаб ўтмоқда.
“Очиғини айтсам, биз 18-24 ёшлиларга, агар шерикларимиз хоҳласа, улар ҳам хизмат қила олишларини кўрсатиш учун имконият бердик. Буни биз ҳозир уларга қонунчилигимизга мувофиқ равишда тақдим этдик. Аммо шу вақтда минглаб одамлар тегишли қуролларсиз жанг майдонида курашмоқда”, деган Украин президенти.
Украина президенти Владимир Зеленский 2024 йилда Украинанинг айрим қонун ҳужжатларига ҳарбий хизмат, сафарбарлик ва ҳарбий рўйхатга олишнинг айрим масалалари бўйича ўзгартиришлар киритиш ҳақидаги қонунни имзолаганди.
Қонунга кўра, сафарбарлик чоғида 18 ёшдан 60 ёшгача бўлган эркаклар ўзлари билан ҳар доим ҳарбий рўйхатга олинганлик тўғрисидаги ҳужжатни олиб юришлари ва уни ҳудудий қабул қилиш маркази вакилининг илтимосига биноан тақдим этишлари шарт.
Изоҳ (0)