Британия аллақачон Россия билан уруш олиб бормоқда. АҚШга энди ишончли иттифоқчи сифатида таяниш мумкин эмас, дея хабар берди The Independent инглиз ҳукумати вакилларидан бирига таяниб.
Дональд Трампнинг биринчи президентлик муддатида Оқ уйнинг Россия бўйича бош маслаҳатчиси бўлиб ишлаган Фиона Хилл Буюк Британия “жуда катта муаммога дуч келганини” айтиб, мамлакат Россия ва АҚШ ўртасида қолиб кетганини таъкидлаган. У Кремль йиллар давомида “Буюк Британияга турли йўллар билан таҳдид солаётганини” таъкидлаб, “заҳарлаш, суиқасд, қўпорувчилик операциялари, барча турдаги киберҳужумлар ва таъсир ўтказиш операциялари”ни мисол қилиб келтирган.
Фиона Хилл, Лорд Робертсон ва генерал сер Ричард Барронс муаллифлигида ҳукумат “Стратегик мудофаа шарҳи” ишлаб чиқилган. Унда айтилишича, Британия армияси Россия таҳдиди ва Хитойнинг кучайиши олдида “10 баробар кучлироқ” бўлиши керак.
Шарҳга кўра, қуролли кучлар қурол-яроғ захиралари етарли эмас, оммавий қурбонлар тўқнашувига дош бера олмайдиган тиббий хизмат ва оз сонли қўшин таркибига эга.
Буюк Британия бош вазири Кир Стармер мамлакатни “жангга тайёр, зирҳли давлат”га айлантиришга сўз берганди. Режага кўра, армияни 100 минг кишига етказиш, 12 та янги сув ости кемасини ишга тушириш, дронлар ва сунъий интеллект тизимларини жойлаштириш кўзда тутилган.
Трамп маъмуриятини қаттиқ танқид қилган Хиллнинг айтишича, Британия энди Совуқ уруш давридагидек АҚШнинг ёрдамига аввалгидек таяна олмайди. Оқ уй ҳақида гапирар экан, Хилл бу “маъмурият эмас, балки суд” эканини таъкидлаган. Президент биринчи навбатда “ўз хоҳиш-истаклари ва манфаатларини устун қўйишини” билдирган.
Изоҳ (0)