Украина ҳар қандай самарали музокара форматига тайёр, бироқ Россия воқеликка тўғри келмайдиган шартларни қўйишни тўхтатиши лозим. Бу ҳақда Украина президенти Владимир Зеленский ўзининг Telegram каналида маълум қилди.
Зеленский финляндиялик ҳамкасби Александр Стубб билан суҳбатлашганини маълум қилган. Унинг айтишича, музокаралар давомида томонлар бир-бирларини ҳамкорлар билан алоқалар тўғрисида хабардор қилган, шунингдек Оқ уй раҳбари Дональд Трамп билан кечаги суҳбат тафсилотларини муҳокама қилинган.
Таъкидланишича, Россия ҳозирда урушни давом эттириш учун вақт ютишга уринмоқда. Киев эса ўз навбатида Ғарб билан ҳамкорликда россияликларни бошқача хатти-ҳаракатларга мажбурлаш устида ишламоқда.
“Уруш аниқ ва реал таклифлар бўлиши лозим бўлган музокаралар столида якунланишига шубҳа йўқ. Украина ҳар қандай самарали музокара форматига тайёр. Агар Россия бундан буён ҳам воқеликка тўғри келмайдиган шартларни илгари сурса ва эришилиши мумкин бўлган натижаларга путур етказса, қатъий чоралар кўрилиши лозим”, дея қўшимча қилди у.
19 май куни АҚШ президенти Дональд Трамп Россия президенти Владимир Путин ва Украина раҳбари билан телефон орқали мулоқот қилган. Шу билан бирга, у Зеленский билан икки марта гаплашган: аввал унга қўнғироқ қилган, кейин Путин билан суҳбатлашган, шундан сўнг яна Украина президенти билан боғланган.
Музокаралар якунида Оқ уй раҳбари Россия ва Украина ҳарбий ҳаракатларни тўхтатиш ва қуролли можарони якунлаш учун музокаралар столига ўтириши кераклигини таъкидлаган.
Изоҳ (0)