АҚШ президенти Дональд Трамп Украинага қилинган энг йирик авиаҳужум сабабли Россия раҳбарини танқид қилиб, уни “бутунлай ақлдан озган” деб атаганди. Россия президенти матбуот котиби Дмитрий Песков мазкур танқидларга муносабат билдирди.
Песковга кўра, АҚШнинг Россия ва Украина ўртасидаги музокараларни бошлаш учун “жуда катта саъй-ҳаракатлар” кўрсатгани “ҳиссий зўриқишни” келтириб чиқарган.
Шубҳасиз, Америка томони жуда катта куч сарфлаган музокаралар жараёнининг бошланиши жуда муҳим ютуқдир. Биз америкаликларга ва шахсан президент Трампга музокаралар жараёнини ташкил этиш ва бошлашда кўрсатган кўмаги учун миннатдормиз. Бу жуда масъулиятли жараён бўлиб, у барча одамларнинг мутлақ ҳиссий зўриқиши ва ҳиссий муносабатлари билан кечади. Биз барча реакцияларни синчковлик билан кузатиб бормоқдамиз, деган Песков.
У Россия хавфсизлигини таъминлаш учун президент Путин “зарур бўлган қарорларни қабул қилаётгани”ни таъкидлади. Песков бунга Украинанинг 9 май куни Москвадаги Ғалаба парадида жаҳон етакчиларининг хавфсизлиги ҳақидаги баёнотларини мисол қилиб келтирди.
Унинг сўзларига кўра, кўплаб етакчилар “дронлар билан ҳужум қилишга уриниш”нинг бевосита гувоҳи бўлган ва бу ҳолатлар ҳозиргача давом этмоқда. У шунингдек, Украина Россиянинг “ижтимоий ва тинч инфратузилмасига зарба бераётгани”, Москва эса бунга жавобан “ҳарбий нишонларга зарба бераётганини” даъво қилган.
Изоҳ (0)