Россия делегацияси 2 июнь куни Истанбулда бўлиб ўтган музокараларда Украинага урушни тўхтатиш учун иккита вариантни таклиф қилди. Тегишли ҳужжатни “РИА Новости” эълон қилди.
Биринчи вариантга кўра, Россия қўшинлари томонидан қисман босиб олинган Украинанинг тўртта вилоятидан — Донецк, Луганск, Запорожье ва Херсондан украин армияси босқичма-босқич чиқиб кетиши керак. Украина ўз армиясини Россия чегараларидан “келишилган” масофага олиб чиқиши лозим.
Иккинчи таклиф тўғридан-тўғри баҳсли ҳудудларни Москвага топширишни назарда тутмайди, аммо бир қатор шартларни ўз ичига олади. Улар орасида қуйидагилар бор: Украинада сафарбарликни тақиқлаш ва демобилизацияни бошлаш, халқаро ҳамкорларнинг Киевга қурол-яроғ, разведка маълумотлари ҳамда сунъий йўлдош алоқасини етказиб беришини тўхтатиш, Россия ҳудудидаги “диверсиялар”га барҳам беришга кафолат бериш, ҳар икки томон учун умумий амнистия эълон қилиш ва қўлга олинган тинч аҳолини озод қилиш.
Бундан ташқари Россия ҳарбий ҳолат бекор қилингандан кейин 100 кун ичида президент ва парламент (Олий Рада) сайловларини ўтказишни талаб қилмоқда. Иккинчи вариант Украинада учинчи давлат ҳарбий хизматчиларининг бўлишини истисно қилади. Шунингдек, Украина армиясининг ҳаракатланишини тақиқлашни ўз ичига олади.
Икки делегациянинг Истанбулдаги учрашувидан олдин уларнинг раҳбарлари — Украина мудофаа вазири Рустем Умеров ва Россия президенти ёрдамчиси Владимир Мединский 2,5 соат давомида юзма-юз учрашув ўтказган.
Россия тайёрлаган меморандум лойиҳасида Москва учун муҳим бўлган бир қанча тинчлик шартлари келтирилган. Улар қуйидагилар:
- Россия босиб олган ҳудудларнинг халқаро даражада Россияга қарашли деб тан олиниши;
- Украина ҳарбий иттифоқларга (масалан, НАТО) қўшилишдан воз кечиши;
- Рус тилига расмий тил мақоми берилиши;
- Россия ва Украина ўртасидаги барча мавжуд санкциялар бекор қилиниши ва янги санкциялар киритилмаслиги;
- Россия газининг Украина орқали транзити тикланиши, бошқа иқтисодий, дипломатик ва транспорт алоқалари қайта йўлга қўйилиши;
- Урушдан кўрилган зарарларга оид ўзаро даъволардан воз кечиш;
- Украина қуролли кучларининг сони ва таркибига чекловлар киритилиши;
- “Натсизм ва неонатсизмни улуғлаш ва тарғиб қилиш” тақиқланиши, “миллатчи” партиялар тугатилиши;
- Украинада ядросиз мақом сақланиши;
- Украина православ черковига нисбатан амалдаги чекловлар бекор қилиниши.
Изоҳ (0)