Россия ва Украина эҳтимолий ўт очишни тўхтатиш режимини амалга ошириш бўйича бир-бирга турлича талаблар қўймоқда ва ҳозирда уларни келиштириб олиш лозим. Бу ҳақда Туркия ташқи ишлар вазири Ҳоқон Фидан Польшадан Украинага сафар қилаётган пайтда поездда ҳамроҳ журналистлар билан суҳбатда маълум қилган, дея хабар бермоқда TRT телеканали.
“Музокаралар жараёни бошланиши билан масалалар янада жиддий тус олаётганини кўряпман. Бошқача айтганда, одатда ҳар икки томон ҳам ўт очишни тўхтатишни истайди, ҳеч ким бунга қарши эканини айтмайди. Буни жаҳон жамоатчилигига тушунтириш осон бўлмасди. Бироқ, бошқа томондан, ҳар икки томоннинг ўт очишни тўхтатиш бўйича талаблари фарқ қилади.
Бу талабларни келиштириб олиш керак. Музокаралар ва воситачилик айнан шу мақсадда ўтказилади. Бу талаблар келиштирилаётганда, улар маълум даражада бир-бирига зид келади. Буларнинг барчасини мувозанатга келтирганимизда, ўт очишни тўхтатишга эришиш учун аниқроқ қадамлар қўйиш мумкин бўлади”, деди Фидан.
Унинг тушунтиришича, Россия томони 30 кунлик ўт очишни тўхтатиш бошланса, бундан нима ютишини сўрамоқда.
“Агар, айтайлик, 30 кундан сўнг уруш қайта бошланса, бу ҳақда келишишнинг нима фойдаси бор? Россия Федерациясининг бу борада муайян шартлари мавжуд. Яъни, нима учун биз ҳозир ўт очишни тўхтатиш ҳақида келишяпмиз, деган савол, албатта, муҳим ва ўринлидир. Уруш қайта бошланган тақдирда бу шартлар музокаралар учун очиқ масала ҳисобланади”, деди Туркия ташқи ишлар вазири.
Фиданнинг фикрича, украинлар ва россияликларнинг позициялари дастлаб бир-биридан анча узоқ, бироқ воситачилик орқали уларни яқинлаштириш мумкин.
“Албатта, бу ерда Америка ҳам муҳим рол ўйнайди. АҚШ президенти Дональд Трампда кучли ирода бор, у ўт очишни дарҳол тўхтатишни хоҳлайди. Ҳозирча Украина ва Европа томони Америка позициясига мослашишда эгилувчанлик намойиш этди. Агар Россия худди шундай даражада мослашувчанлик кўрсата олмаса, у Америка назарида ноқулай аҳволга тушиб қолиши мумкин”, дея таъкидлади Ҳоқон Фидан.
Россия 28 май куни 2 июнда Истанбулда Украина билан тўғридан-тўғри музокараларнинг иккинчи босқичини ўтказишни таклиф қилди. Киев бунга жавобан томонлар позицияларини аниқлаштириш шартини қўйди.
Изоҳ (0)