Россия учун БМТ бош штабини Сочига жойлаштириш яхшироқ бўларди, бу ўз вақтида СССР раҳбари Иосиф Сталин томонидан таклиф қилинган. Бу ҳақда Россия ташқи ишлар вазири Сергей Лавров маълум қилди.
“БМТни Сочига кўчириш энг яхши йўл бўларди. Айтганча, Сталин буни таклиф қилган. Жиддий равишда таклиф қилинган эди. Лекин кейин (АҚШ президенти Франклин Делано) Рузвельтга ён босиб — аввал Лонг-Айленд, сўнгра Нью Йорк, Манхеттенни танлади”, дейди Сергей Лавров.
Шу билан бирга, Лавров инфратузилма масалалари туфайли буни ҳозирча амалга ошириб бўлмаслигини таъкидлаган. Унинг айтишича, бунинг учун шартномаларни қайта тузиш, ходимлар учун янги турар жой излаш керак бўлади, бу эса “тасаввур қилиш ҳам даҳшатли бўлган халқлар кўчишига” олиб келади.
“Бу тузилмаларнинг барчаси чуқур илдиз отган. Нафақат жисмоний жиҳатдан бинолар ва мулк кўринишида, балки ходимлар жиҳатидан ҳам”, дейди Россия ташқи ишлар вазири.
Лавров ташкилотни танқид қилиб, устав тамойилларига танлаб риоя қилиш мумкин эмаслигини таъкидлаган ва БМТнинг давлатларнинг суверен тенглиги тамойилига муносабати менюда “котлет ва балиқ”ни танлашга ўхшашини билдирган.
“Ғарб кўраётганидек ҳуқуқни қўллаш амалиёти мутлақо яроқсиз. Бироқ халқаро-ҳуқуқий асосларга келсак, БМТ низоми кимга ёқмай қолди? Унда таъкидланишича, Бирлашган Миллатлар Ташкилотининг бутун фаолияти барча мамлакатларнинг тенглиги тамойилига асосланади ва бир-бирининг ички ишларига аралашиш мумкин эмас. Бошқа масала шундаки, уставнинг ушбу тамойилларини менюдаги каби танлаб қўллаш керак эмас: ўзингизга котлетни танладингиз, балиқни эса хоҳламайсиз — Ғарб худди шундай қилмоқда”, деди Лавров.
Бундан аввал америкалик тадбиркор Илон Маск Бирлашган Миллатлар Ташкилоти бош котиби Антониу Гутерришнинг рақамли платформалар ҳақидаги баёнотидан кейин БМТни молиялаштиришни тўхтатишга чақирганди.
Изоҳ (0)