Россия президенти Владимир Путин Шимолий Корея етакчиси Ким Чен Инга йўллаган мактубида Украинага қарши жангларда қатнашган КХДР аскарларини “қаҳрамон” деб атади.
Путин ўз мактубида совет ва корейс қўшинлари Иккинчи Жаҳон уруши даврида елкама-елка жанг қилганини эслатиб, “бу дўстлик бугун ҳам мустаҳкам” эканини таъкидлади.
Россия президенти Шимолий Корея аскарларининг Курск вилоятини қайтариб олишдаги иштирокини эътироф қилиб, уларнинг “жасорати ва фидойилиги абадий эсланишини” қайд этди. KCNA агентлигига кўра, Пхеньянга ташриф буюрган Россия Давлат думаси спикери Вясҳеслав Володин ҳам Ким Чен Инга Украина армиясига қарши жанг қилган аскарлар учун алоҳида миннатдорчилик билдирган.
Жанубий Корея томони берган маълумотга кўра, Россия армияси сафида жанг қилган Шимолий Корея аскарлари 10 мингдан ошган, улардан қарийб 600 нафари ҳалок бўлган. Корейслар асосан Курск вилоятидаги жангларда қатнашган.
Россия армияси Курск вилоятининг катта қисмини қайтариб олгач, корейс аскарлари жанг майдонида кўринмай қолди. Улар ўз юртига юборилган бўлиши мумкин. Бироқ Украина ҳарбий разведкаси раҳбари Крилл Будановнинг айтишича, Пхеньян яна 6000 нафар ҳарбий хизматчи жўнатиш вариантини кўриб чиқмоқда.
Изоҳ (0)