АҚШ президенти Дональд Трамп Германия канцлери Фридрих Мерц билан учрашувда АҚШ гази ва нефтини етказиб бериш ҳажмини оширишни таклиф қилди.
Трамп буни ҳозирда АҚШ ва Европа Иттифоқи ўртасида муҳокама қилинаётган савдо битимига киритишни илгари сурган. Евроиттифоқ илгари ҳам АҚШдан энергия ресурсларини кўпроқ харид қилишга тайёр эди. Бу Трампнинг савдо дефицити ҳақидаги хавотирларини камайтиришга ёрдам берарди. Айни пайтда таклиф Германия учун фойдали бўлиши мумкин.
Россия “Шимолий оқим” орқали Европага газ етказиб беришни тиклаш учун америкаликларни жалб қилишга ҳаракат қилди. Бу эса Мерцни ушбу режаларга қарши курашишга мажбур қилди, дейилади хабарда.
Савдо келишуви Мерцнинг Оқ уйга биринчи ташрифи давомида муҳим мавзуларидан бири бўлди. Трампнинг сўзларига кўра, у келишув натижасида америкалик энергия ресурслари экспорти ошишига умид қилмоқда ва Мерц бунга ёрдам беради:
Бизда яхши савдо битими бўлади. Менимча, бу асосан Европа Иттифоқи томонидан белгиланади, лекин сиз бунинг жуда катта қисми ҳисобланасиз. Бизда жуда кўп нефть ва газ бор, деган АҚШ президенти.
2024 йилда Европа Иттифоқи АҚШдан тахминан 51 миллиард куб метр суюлтирилган табиий газ (СТГ) сотиб олди, бу эса Европанинг 114 миллиард куб метрлик СТГ импортининг 45 фоизини ташкил этди. АҚШ энг йирик етказиб берувчи бўлди. Россия икки баравар кам СТГ сотди (25 миллиард куб метр), бироқ унинг қувур орқали газ етказиб бериш ҳажми 2021 йилдан бери 155 миллиарддан 40 миллиард куб метргача камайган бўлса-да, худди шу даврда Европа Иттифоқи мамлакатларига СТГ экспорти икки бараварга ошди.
Европа Иттифоқи 2027 йил охиригача Россия энергия ташувчиларидан бутунлай воз кечмоқчи. Еврокомиссия тегишли режани тайёрламоқда, бироқ бир қатор давлатлар бунга қарши чиқмоқда. Венгрия ва Словакия газ етказиб беришдан бош тортмоқчи эмас. Франция ва Бельгия эса Европа Иттифоқидан аниқроқ ҳуқуқий ва иқтисодий асосларни тақдим этишни талаб қилмоқда.
Изоҳ (0)