АҚШ президенти Дональд Трамп Украина можаросини ҳал этишда “илгари силжиш бўлмаганда” Россия ва Украинага нисбатан босим ўтказиш эҳтимолини рад этмади. Бу ҳақда Америка раҳбари Овал кабинетда Германия канцлери Фридрих Мерс билан учрашувда маълум қилди, дея хабар бермоқда Fox News.
“Агар бу можаронинг тугамаслигини англасам, биз жуда қаттиқ чоралар кўрамиз. Очиғини айтганда, бу иккала мамлакатга ҳам таъсир қилиши мумкин”, деди Америка раҳбари.
Трамп тинчлик келишувини тузиш муддатини “хаёлида” сақлаб турганини таъкидлади ва агар можарони ҳал қилиш уринишлари муваффақиятсиз бўлса, “Россия ёки бошқа бирор-бир томон” бўлишидан қатъи назар, АҚШ жуда қатъий позицияда туришини таъкидлаган.
“Америка яна бир бор бу урушни тўхтатиш учун муҳим ўрин эгалламоқда. Келинг, биргаликда нима қила олишимиз ҳақида муҳокама қилайлик”, дея жавоб берди Мерс.
Германия канцлери Германиянинг Украинани қўллаб-қувватлаётгани ва шу сабабли Россияга кучли босим ўтказишга интилаётганини таъкидлаган. Мерс бу мавзуни муҳокама қилиш зарурлигини қўшимча қилган ва Трамп бу ҳақда гаплашишга ваъда берган.
Шунингдек, Трамп сўнгги кунларда Украина атрофидаги вазият кескинлашганидан норозилигини билдирган. Шу билан бирга, АҚШ президенти Украинадаги вазиятни тартибга солиш масаласида ҳамон муваффақиятга умид қилаётганини таъкидлаган.
Бундан аввал Axios портали Трамп Украина Қуролли кучларининг Россия аэродромларига ҳужуми ва Россиянинг эҳтимолий жавоби Украина можаросини ҳал қилиш бўйича дипломатик саъй-ҳаракатларга тўсқинлик қилишидан ташвишланмоқда ва хавотирда эканлиги ҳақида хабар берганди.
АҚШ президенти Дональд Трамп россиялик ҳамкасби Владимир Путин билан 4 июнь куни телефон орқали мулоқот қилди. Суҳбатда томонлар Украинанинг “Ўргимчак тўри” номи остида Россия ҳарбий аэродромларига қилган операциясини ҳам муҳокама қилди.
Мулоқот давомида Путин Украинада яқин орада тинчлик бўлишини кутмаслик кераклигини билдирган. Шунингдек, у Москва аэродромларига уюштирилган ҳужумга жавоб қайтарилишини таъкидлаган.
Изоҳ (0)