Россия Мудофаа вазирлиги 25 ёшгача бўлган россиялик ҳарбий хизматчиларнинг биринчи гуруҳи Истанбулдаги келишувларга мувофиқ Россияга қайтарилганини маълум қилди. Бу ҳақда BBC хабар берди.
Алмаштирилганлар сонига аниқлик киритилмаган. Украина президенти Владимир Зеленский иккинчи йирик алмашинув бошланганини тасдиқлаган. Унинг сўзларига кўра, алмашинув бир неча босқичда бўлиб ўтиши режалаштирилган.
“Россиялик ҳарбий хизматчиларнинг 25 ёшгача бўлган биринчи гуруҳи қайтарилди. Бунинг эвазига Украина Қуролли кучларининг худди шунча миқдордаги ҳарбий асирлари алмашилди” дейилади Россия Мудофаа вазирлиги баёнотида.
“Бугун алмашинув бошланди. Яқин кунларда бир неча босқичда давом этамиз. Ҳозирда қайтарилаётганлар тоифасига ярадорлар ва оғир ярадорлар, шунингдек, 25 ёшгача бўлганлар киради. Жараён анча мураккаб, нозик деталлар кўп, музокаралар деярли ҳар куни давом этмоқда. Барчани ортга қайтариш учун қўлимиздан келганини қилмоқдамиз”, деди Зеленский.
Сўнгги марта 23—25 май кунлари Россия ва Украина ўртасида асирлар алмашинуви амалга оширилган. Биринчи куни томонларнинг ҳар бири 270 нафар ҳарбий ва 120 нафар фуқарони, иккинчи куни 307 нафар ҳарбий хизматчини, учинчи куни эса 303 нафар ҳарбий хизматчини топширган. Ушбу алмашинув 2022 йилда жанговар ҳаракатлар бошланганидан бери энг йирик алмашинув бўлган.
Изоҳ (0)