Россияда ишламаётган, ўқимаётган ҳамда бармоқ изини топширмаган ва рус тилини ўрганмаган мигрантларни чиқариб юбориш таклиф қилинди. Бу ҳақда “РБК” хабар бермоқда.
“Кўчаларда ва турар жой секторида ноқонуний мигрантлар бўлмаслиги керак. Ишини йўқотганлар, ОТМдан ҳайдалганлар, дактилоскопиядан ўтмаганлар, тил ўрганмаётганлар, Россия жамиятига фойда келтирмаётганлар мамлакатимизни тарк этиши керак”, деган Россия ички ишлар вазири Владимир Колоколцев.
ИИВ раҳбари мигрантлар ўртасидаги жиноятчиликка қарши тизимли курашишга чақирди ва кўрилган чораларни “айбдорлар учун жазо муқаррарлигини таъкидлаган ҳолда” ёритиш кераклигини айтди.
Вазир миграция бўлимларидаги навбатларга барҳам бериш учинчи зарур чора эканлигини таъкидлади. “Ҳужжатларни қабул қилиш ва расмийлаштиришни ўз вақтида, ажиотажсиз амалга оширилиши керак”, деган Владимир Колоколцев.
Май ойининг охирларида депутат Ярослав Нилов Россияда мигрантлар номига биттадан ортиқ SIM-картани расмийлаштиришни тақиқлашни таклиф этганди. Россия мактабларида ўқиш учун рус тили имтиҳонидан уч марта ўта олмаган мигрантларнинг фарзандларини ватанига қайтариб юборишни ҳам таклиф қилганди. Мигрант аёллар учун бепул туғуруқни тақиқлаш ҳам таклиф қилинган.
Бундан бир неча кун аввал Москвадаги рейдда Россия ҳуқуқни муҳофаза қилувчи органлари (ОМОН) томонидан ушбу давлатда вақтинча меҳнат фаолиятини олиб бораётган хориж фуқароларига нисбатан жисмоний куч қўлланилгани муҳокамаларга сабаб бўлганди. Ўзбекистон Россия ТИВдан ушбу ҳолатга изоҳ бериш ҳамда кучишлатар ташкилот вакилларининг ҳаракатларига ҳуқуқий баҳо беришни сўраб нота юборди. Россия ТИВ ахборот хизмати раҳбари Мария Захарова ушбу нотадаги маълумотлар диққат билан ўрганилаётганини маълум қилди.
Изоҳ (0)