Канада НАТОнинг режасидан бир неча йил олдин ялпи ички маҳсулотнинг 2 фоизи миқдоридаги мақсадига эришиш учун мудофаа харажатларини сезиларли даражада оширади. Бу ҳақда бош вазир Марк Карнига таяниб BBC хабар берди.
Карни 9 июнь куни Торонто университетида сўзлаган нутқида бу ҳаракат душман ҳукуматлар, террористик тузилмалар ва кибержиноятчиларнинг “ортиб бораётган” таҳдидларини бартараф этиш учун зарурлигини билдирган.
Шунингдек, у ўз мамлакати мудофаа учун Қўшма Штатларга “жуда боғланиб қолганини” тан олиб, Вашингтон “коллектив хавфсизликка қўшаётган ҳиссасини камайтираётганини” қўшимча қилган.
НАТО бош котиби Марк Рютте аъзоларни шу ой охирида бўлиб ўтадиган саммитда ялпи ички маҳсулотнинг 3,5 фоизи миқдоридаги янги харажатлар бўйича келишувга эришишга ундамоқда.
Марк Карни ўз нутқида дунё Иккинчи жаҳон уруши тугашидаги каби “тўхташ нуқтасида” эканини айтган. Унга кўра, мамлакат “тажовузкор Россия, Хитой ҳамда Арктика хавфсизлигига таҳдидлар” қаршисида чоралар кўриши керак. Шунингдек, у Вашингтонни ўз бозорига киришни қимматроқ қилиш орқали “гегемонлигини монетизация қилишга” интилишда айблаган.
Канада 2024 йилда ялпи ички маҳсулотининг 1,4 фоизини мудофаага сарфлаган. 2025 йил бошида бўлиб ўтган сайловолди нутқида Карни 2030 йилга бориб харажатларнинг 2 фоизлик кўрсаткичига эришишга ваъда берганди. Жастин Трюдо бошчилигидаги аввалги ҳукумат эса буни 2032 йилгача бажармоқчи эди. Бироқ 9 июнь куни Карни харажатлар мақсадига 2026 йилнинг март ойигача эришилишини маълум қилган.
Бош вазирнинг айтишича, Канаданинг техникаси эскириб қолган ва ҳарбий тайёргарликка тўсқинлик қилмоқда. 4 та сув ости кемасидан фақат 1 таси денгизга чиқишга яроқли. Денгиз флоти ҳамда қуруқликдаги транспорт воситаларининг ярмидан камроғи нисбатан яхши ҳолатда экани таъкидланган.
Янги стратегия 4 та устунга эга бўлади — аскарлар ва техникага кўпроқ сармоя киритиш, ҳарбий салоҳиятни кенгайтириш, ички мудофаа саноатини мустаҳкамлаш ва Канаданинг мудофаа ҳамкорлигини диверсификация қилиш.
Журналистлар билан суҳбатда Карни ҳукуматнинг янги режаси 2025 йилда нақд пулни 9,3 миллиард Канада долларига (6,5 миллиард доллар) оширишни ўз ичига олишини билдирди.
Уларнинг бир қисми кадрлар ва техникага дарҳол сарфланиши айтилган. Бу янги сув ости кемалари, самолётлар, кемалар, зирҳли транспорт воситалари ва артиллерия, шунингдек, Арктикадаги фаолликни ва янги дронлар ҳамда сенсорларга сармоя киритишни ўз ичига олиши билдирилган.
НАТО аъзолари йиллар давомида 2 фоизлик мақсадни бажаришга ваъда беришган — ҳозирда бу минимал кўрсаткич сифатида қаралади. Аммо Канада узоқ вақтдан бери иттифоқчиларидан ортда қолмоқда.
Изоҳ (0)