Шавкат Мирзиёев Россия Федерацияси президенти Владимир Путин билан телефон орқали мулоқот қилди. Бу ҳақда Президент матбуот хизмати хабар берди.
Суҳбат аввалида давлат раҳбари Россия етакчиси ва кўп миллатли халқини яқинлашиб келаётган давлат байрами — Россия куни билан табриклади. Ўзбекистон билан Россия ўртасидаги кенг қамровли стратегик шериклик ва иттифоқчилик муносабатларини янада мустаҳкамлаш, олий даражадаги учрашувларда эришилган келишувларни амалга ошириш доирасида кўп қиррали ҳамкорликни кенгайтириш масалалари кўриб чиқилди.
Ўзаро товар айирбошлаш суръатини сақлаб қолиш ва саноат кооперацияси лойиҳаларини қўллаб-қувватлаш мақсадида мувофиқлаштирилган чоралар кўришга алоҳида эътибор қаратилди.
Икки мамлакат ҳудудлари даражасидаги фаол алмашинувлар ва амалий ҳамкорликни давом эттириш муҳимлиги таъкидланди.
Шунингдек, Ўзбекистон ва Россияда маданий тадбирлар мунтазам ўтказиб келинаётгани қайд этилди.
12 июнь Россия куни
Россия куни — Россия Федерациясининг давлат байрами бўлиб, ҳар йили 12 июнь куни нишонланади.
Россия куни 1990 йил 12 июнь куни Россия Совет Федератив Социалистик Республикаси (РСФСР) томонидан Давлат суверенитети тўғрисидаги декларация қабул қилинган санага бағишланган. Бу ҳужжат Россиянинг мустақилликка томон илк ҳуқуқий қадамларидан бири бўлган.
1992 йилдан бошлаб бу сана расмий равишда байрам сифатида нишонлана бошлаган. 2002 йилдан эса “Россия куни” деб расмий номланган.
Байрам қандай нишонланади?
Россия куни давлат миқёсида кенг нишонланади:
Москва, Санкт-Петербург ва бошқа йирик шаҳарларда байрамона тадбирлар, концертлар, оммавий юришлар ва салютлар бўлиб ўтади.
Давлат мукофотлари топширилади, фахрий унвонлар берилади.
Расмий маросимларда Президент мурожаат қилади.
Баъзи аҳолининг фикрича, бу сана “Россиянинг туғилган куни” деб ҳам қабул қилинади.
Изоҳ (0)