Россия Украинанинг иккинчи йирик шаҳри Харьковга улкан дрон ва бомбардимончи ҳужуми уюштирди. Бу ҳақда BBC хабар берди.
Расмийларга кўра, ҳодиса оқибатида 4 киши ҳалок бўлган, 60 га яқин киши яраланган. Шунингдек, Россиянинг Украина жанубидаги Херсонга берган зарбалари оқибатида 2 киши ҳалок бўлган.
Харьков мери Игор Тереховнинг айтишича, 6 июнь куни кечаси шаҳарга 48 та дрон, 2 та ракета ва 4 та қанотли бомба ташланган. 7 июнь куни эса яна қанотли бомбалар ташланган.
Аввалроқ Москва 5 июнга ўтар кечаси Украина бўйлаб дрон ва ракета ҳужумларининг улкан тўлқини “Киев режими томонидан амалга оширилган террорчилик ҳужумларига” жавоб бўлганини билдирганди.
Харьковда 6 июнь куни кечаси тахминан 18 та кўп қаватли уй ва яна 13 та уйга зарба берилган. Жабрланганлар орасида чақалоқ ва 14 ёшли қиз ҳам бор, дея қўшимча қилинган.
“Битта фуқаролик саноат объектига 40 та дрон, 1 та ракета ва 4 та бомба билан ҳужум қилинди. Вайроналар остида ҳали ҳам одамлар бўлиши мумкин”, деди Харьков губернатори Олег Синегубов.
Украина ташқи ишлар вазири Андрей Сибиха иттифоқчиларни Москвага босимни кучайтиришга ва Россиянинг сўнгги ҳужумларига жавобан “Украинани мустаҳкамлаш учун кўпроқ чоралар” кўришга чақирган.
5 июнга ўтар кечаси Россия мамлакатга 400 дан ортиқ дрон ва 40 га яқин ракета билан ҳужум қилганида Украина бўйлаб 6 киши ҳалок бўлган ва 80 киши яраланганди.
Изоҳ (0)