Россия ҳарбий разведкаси Украинага юборилаётган Ғарб ёрдамини кузатиш ва уни издан чиқариш мақсадида чегарадаги хавфсизлик камераларини хакерлик йўли билан бузган. Бу ҳақда The Guardian хабар берди.
Маълумотларга кўра, Россиянинг ҳарбий разведка бўлинмаси “хорижий ёрдам” кўрсатувчи ташкилотларни нишонга олиш учун чегара ўтиш пунктлари, темирйўл бекатлари ва ҳарбий объектлар яқинидаги қарийб 10 минг камерага рухсатсиз кирган. Ушбу камераларнинг 80 фоизи Украинада, 10 фоизи Руминияда, 4 фоизи Польшада, 2,8 фоизи Венгрияда ва 1,7 фоизи Словакияда жойлашган. Қолганлари қаердалиги маълум қилинмаган.
Хакерлик ҳужумлари натижасида камералардан скриншотлар олинган, поездлар ҳаракати жадваллари ва юк ҳужжатларига оид махфий маълумотлар қўлга киритилган.
Таъкидланишича, Россия ҳарбий разведкасининг 26165-бўлинмаси фишинг хатлари юбориш, порнографик ёки сохта маълумотларни тарқатиш, бузилган аккаунтлар ва ўғирланган пароллар орқали тизимларга киришда айбланмоқда.
Ўнта давлат, жумладан, АҚШ, Франция ва Германия томонидан эълон қилинган баёнотга кўра, камида бир ҳолатда хакерлар ўзларини IT мутахассиси сифатида кўрсатиб, имтиёзли ҳисобларга кириш учун телефон орқали фирибгарлик уюштиришга уринган.
Фишинг хатларининг мавзуси эса турлича бўлган: касбий масалалардан тортиб катталар контентигача. Улар кўпинча бузилган аккаунтлар ёки бепул почта хизматлари орқали юборилган бўлиб, қабул қилувчининг тилида ёзилган ва аниқ бир шахсга йўналтирилган.
Буюк Британия Миллий киберхавфсизлик маркази (NCSC) Украинага ёрдам етказиб беришда иштирок этаётган хусусий компанияларни зудлик билан хавфсизлик чораларини кўришга чақирмоқда.
Логистика компанияларига ҳужумлардан ташқари, 26165-сонли ҳарбий бўлинма ходимлари Украинага материаллар ҳаракатини кузатиш мақсадида чегара ўтиш пунктлари, ҳарбий объектлар ва темирйўл бекатлари каби муҳим жойлардаги шахсий камераларга киришдан фойдаланган... Жиноятчилар, шунингдек, қонуний муниципал хизматлардан, хусусан, йўл ҳаракатини назорат қилувчи камералардан ҳам фойдаланган, дейилади огоҳлантиришда.
Россия разведкасининг бу кампанияси Украинага ёрдам етказишда иштирок этаётган ташкилотлар учун жиддий хавф туғдиради.
Буюк Британия ҳамкорлар билан биргаликда қўлланаётган тактика ҳақида хабардорликни оширишга ҳаракат қилмоқда. Биз ташкилотларни ҳисоботда келтирилган таҳдид тавсифи ва ҳимоя бўйича тавсиялар билан танишиб чиқишга қатъий чақирамиз, дейди NCSC операцион директори Пол Чичестер.
Тавсия этилаётган чоралар қуйидагиларни ўз ичига олади: кучайтирилган мониторинг, киришда кўп босқичли аутентификация (пасскейлар ёрдамида), ишончли текширув усуллари ва заифликларни бартараф этишга қаратилган тезкор янгиланишлар.
Мазкур огоҳлантириш АҚШ, Германия, Чехия, Польша, Австралия, Канада, Дания, Эстония, Франция ва Нидерландия разведка хизматлари билан ҳамкорликда тайёрланган.
Изоҳ (0)