АҚШ президенти Дональд Трамп Россия раҳбари Владимир Путин ва Владимир Зеленский билан эҳтимолий учрашувга очиқ, бироқ Москва ва Киев ўртасида тинчлик бўйича икки томонлама музокаралар ўтказилишини афзал кўради. Бу ҳақда Оқ уй матбуот котиби Керолин Ливитт журналистларга маълум қилди.
“Президент агар шу даражага етилса, бунга тайёр эканлигини билдирди. Бироқ у бу икки раҳбар, икки томон бир стол атрофига (музокаралар столига) ўтиришини хоҳлайди. Ва бугун биз уларнинг президент Трамп чақириғига биноан шундай қилганини кўрдик”, деди Ливитт Трампнинг Туркияда Путин ва Зеленский билан уч томонлама музокараларга тайёрлиги ҳақидаги саволга жавоб берар экан.
Ливитт Истанбулда бўлиб ўтган музокараларнинг иккинчи босқичига баҳо бермаган. У Америка раҳбарининг ўзи кейинроқ Россия ва Украина делегациялари учрашуви бўйича ўз нуқтаи назарини билдириши ҳақида маълум қилган.
2 июнь куни Истанбулда Россия ва Украина вакиллари ўртасидаги тўғридан-тўғри музокараларнинг иккинчи босқичи якунланди. Музокаралар тахминан бир соат давом этди, яъни май ойида бўлиб ўтган биринчи босқичдан икки баравар қисқароқ бўлди.
Учрашув Босфор қирғоғидаги Чирўғон саройида ўтказилди. Россия делегациясига, аввалгидек, президент ёрдамчиси Владимир Мединский, Украина делегациясига эса мудофаа вазири Рустем Умиров бошчилик қилди.
Музокаралар якунлари бўйича ўтказилган матбуот анжуманида Украина делегацияси Москва Киевга ўз талабларини етказганини, энди Украина ҳужжатни ўрганиш учун бир ҳафта вақт олишини ва кейинги қадамларини белгилашини маълум қилди.
Россия делегацияси раҳбари Владимир Мединский эса музокаралардан сўнг Россия оммавий ахборот воситаларига берган пресс-ёндашувида Россия меморандуми икки қисмдан иборат эканини — узоқ муддатли тинчликка қандай эришиш ва ўт очишни тўлиқ тўхтатиш учун қандай қадамлар зарурлигини айтди.
Туркия президенти Ражаб Тоййиб Эрдўғон 2 июнь куни Истанбулда Россия ва Украина делегациялари учрашуви бўлиб ўтганини таъкидлаб, музокараларнинг янада юқори даражада давом эттирилишига умид билдирди. Шунингдек, Истанбулни тинчлик ўрнатиш марказига айлантириш истаги борлигини ма`лум қилди.
Изоҳ (0)