Ukraina Rossiyaning beshta hududidagi strategik aerodromlariga dronlar bilan zarba berib, kamida 40 ta samolyotni ishdan chiqardi. Ukraina xavfsizlik xizmati “O‘rgimchak to‘ri” nomli mazkur operatsiyaga bir yarim yildan ortiq tayyorgarlik ko‘rgan. Bu haqda manbalarga tayanib, “UNIAN” xabar berdi.
Xabardor shaxslarga ko‘ra, operatsiyani shaxsan Ukraina prezidenti Vladimir Zelenskiy nazorat qilgan. Bevosita amalga oshirilishini esa Vasiliy Malyuk boshchiligidagi Ukraina xavfsizlik xizmati ta’minlagan. O‘tkazilgan operatsiya natijasida Rossiya strategik aviatsiyasining 41 ta samolyotiga zarba berishga muvaffaq bo‘lingan. Buni hozircha mustaqil ravishda tasdiqlashning iloji bo‘lmagan.
Rossiya tomoni yo‘qotishlar haqida ma’lumot bermagan. Manbalar operatsiyani logistika nuqtayi nazaridan o‘ta murakkab deb tavsiflaydi.
Ta’kidlanishicha, Ukraina maxsus xizmatlari avval FPV dronlarini Rossiya hududiga o‘tkazgan. So‘ngra u yerga ko‘chma yog‘och konstruksiyalarni yetkazib bergan. Dronlar yuk mashinalariga o‘rnatilgan ushbu konstruksiyalarga yashirilgan.
Hujum paytida konstruksiya qopqoqlari masofadan ochilgan, shundan keyin dronlar nishonlarga — Rossiya harbiy samolyotlariga yo‘naltirilgan. Mavjud videomateriallarda dronlarni zarba berishga tayyorlash jarayoni aks ettirilgan.
Bundan tashqari, operatsiyaning barcha ishtirokchilari allaqachon Ukraina hududida ekani ta’kidlangan.
Izoh (0)