АҚШ Украинага ҳарбий ёрдам беришдан бош тортса, Европа давлатлари Америкада ишлаб чиқарилган қуролларни сотиб олиб, уларни Украинага етказиб беришни кўриб чиқмоқда. Бу ҳақда Bloomberg агентлиги хабар берди. Нашрга кўра, Европа Иттифоқининг ўз захиралари ва қурол ишлаб чиқариш имкониятлари пастлиги сабаб ушбу қарор қабул қилиниши мумкин.
Агар АҚШ президенти Дональд Трамп Украинага қурол етказиб беришдан бош тортса, Европа буни амалга оширади. Агентликнинг ишончли манбаларига таяниб ёзишича, илгари АҚШ собиқ президенти Жо Байден томонидан тасдиқланган ва молиялаштирилган қурол-яроғ етказиб бериш дастури шу ёзда тугаши мумкин. Юзага келган бўшлиқни тўлдириш учун Европанинг имкониятлари етарли эмас. Bloomberg таҳлилчилари Россия президенти Владимир Путин фронтдаги бу вазиятдан фойдаланишга уринишидан огоҳлантирмоқда.
АҚШ Украинани ёлғиз қолдириши мумкин
АҚШ президенти Дональд Трамп бир неча бор музокаралар боши берк кўчага кирса, Вашингтон бу жараёндан чиқишини айтган. Оқ уй илгари Европанинг Путин устидан босимни кучайтириш ва зудлик билан ўт очишни тўхтатишга мажбур қилиш ҳақидаги чақириқларини рад этган эди.
Айни пайтда, Кремль Трампга ваъда қилинган тинчлик музокараларини чўзаётган кўринади ва ёзги ҳужумга тайёргарлик кўраётган бўлиши мумкин. Шу ҳафта бошида АҚШ давлат котиби Марко Рубио Россия бир неча кун ичида ўт очишни тўхтатиш бўйича ўз шартларини тақдим этишини айтган эди, бироқ ҳозирча музокараларда аниқ натижалар кўзга ташланмаяпти.
The Wall Street Journalʼнинг ёзишича, Трамп 19 май куни Путин билан телефон орқали суҳбатдан сўнг Европа етакчиларини Россия президенти урушни тугатмоқчи эмаслиги ҳақида хабардор қилган. Нашрга кўра, Путин ўзини урушда ғалаба қозонаяпти деб ҳисоблайди. Европа етакчилари илгари ҳам Путиннинг тинчликни истамаётганини тахмин қилган, аммо бу тахмин илк бор Трампнинг оғзидан тасдиқ топди.
Изоҳ (0)