Франция президенти Эммануэл Макрон АҚШ президенти Дональд Трамп ўзининг россиялик ҳамкасби Владимир Путин уни алдаганини тушуниб етганини, шу боис ғазаб ҳамда сабрсизлик ҳис этаётганини таъкидлади. Унинг сўзларини Le Monde газетаси келтирмоқда.
“Менимча, президент Трамп президент Путин унга тинчликка тайёр эканлигини айтганида, ёлғон гапирганини англади. Сўнгги соатларда биз яна Дональд Трампнинг ғазабини кўриб турибмиз. Бу сабрсизликнинг намоён бўлишидир”, деди у.
Франция раҳбарининг қўшимча қилишича, рўй бераётган воқеалар муносабати билан унинг асосий истаги Трампнинг ғазаби “амалий ҳаракатларга”, яъни Москвага босим ўтказишга қодир бўлган Россияга қарши кенг қамровли санкциялар пакетига айланишидир.
Бундан ташқари, Макрон яна бир бор томонларни ўт очишни тўхтатиш бўйича келишувга эришишга чақирди.
Россия қўшинлари 25 майга ўтар кечаси Украинага дронлар ва ракеталар билан энг йирик авиазарбани амалга оширди. Мазкур авиаҳужумга 298 та дрон жалб этилди. АҚШ президенти Дональд Трамп бунга муносабат билдириб, россиялик ҳамкасби Владимир Путинни кескин танқид қилди.
“Мен ҳар доим Владимир Путин билан жуда яхши муносабатда бўлганман, лекин унга нимадир бўлган. У бутунлай ақлдан озибди! У бекордан бекорга кўп одамларни ўлдиряпти, мен фақат ҳарбийлар ҳақида гапираётганим йўқ. Ракеталар ва дронлар ҳеч қандай сабабсиз Украина шаҳарлари бўйлаб учирилмоқда”, деди Трамп.
Изоҳ (0)