АҚШ президенти Дональд Трамп Украина Қуролли кучлари дронларининг Россия аэродромларига ҳужуми ва Москванинг эҳтимолий жавоби Украинадаги тинчлик жараёнига зарар етказиши мумкинлигидан хавотирланмоқда. Бу ҳақда АҚШ президентига яқин манбаларга таяниб, Axios хабар берди.
“Дронлар ҳужуми уни ҳайратга солмади, чунки бу можаро давом этаётганда юз берадиган ҳодиса, аммо у бу жанговар ҳаракатларнинг чўзилишига олиб келишидан хавотирда. У жанговар ҳаракатлар тўхташини истайди, шунинг учун бундай ҳужумлар содир бўлганда у ташвишга тушади”, деди Оқ уйнинг номи ошкор этилмаган амалдори.
Президентнинг ишончли вакиллари доирасидаги бошқа манбага кўра, Трамп Москванинг эҳтимолий жавоби унинг дипломатик ташаббусини секинлаштириб қўйишидан хавотирда.
Трамп Украина Қуролли кучларининг Россия аэродромларига ҳужумини зўр деб баҳолаган. Таъкидланишича, Оқ уй раҳбари ҳужумни “анча кучли” деб ҳам эътироф этган.
“Ўргимчак тўри” операцияси
Украина Хавфсизлик хизмати 1 июнь куни Россиянинг бешта авиация базаларига қарши кенг кўламли махсус операция ўтказди. Унинг мақсади Россия стратегик авиациясини, хусусан, Украина шаҳарларига мунтазам равишда ҳужум қилган қанотли ракета ташувчиларини ишдан чиқариш эди.
Операция бир ярим йилдан кўпроқ вақт давомида тайёрланган ва пухта режалаштирилган. Ҳужумлар Россияда тўхтаб турган юк машиналаридан учиб чиққан дронлар ёрдамида амалга оширилган. Бу эса Украина чегарасидан узоқ масофада зарбалар беришга имкон берган.
Ғарб экспертлари фикрича, бу операция урушда бурилиш нуқтаси бўлиши мумкин ва Украинанинг Россиянинг стратегик объектларига зарба бериш қобилиятини намойиш этади. Операцияга 117 та дрон жалб қилинган. Улар Россиянинг стратегик қанотли ракета ташувчиларининг 34 фоизини йўқ қилган.
Зеленский операциянинг “офиси” Россия вилоятларидан бирида Федерал хавфсизлик хизмати бошқармаси ёнида жойлашганини айтган. Украина президенти “ноёб операция” учун хавфсизлик хизмати ходимларига миннатдорлик билдирган.
АҚШ президенти Дональд Трамп россиялик ҳамкасби Владимир Путин билан 4 июнь куни телефон орқали мулоқот қилди. Суҳбатда томонлар Украинанинг “Ўргимчак тўри” номи остида Россия ҳарбий аэродромларига қилган операциясини ҳам муҳокама қилди.
Мулоқот давомида Путин Украинада яқин орада тинчлик бўлишини кутмаслик кераклигини билдирган. Шунингдек, у Москва аэродромларига уюштирилган ҳужумга жавоб қайтарилишини таъкидлаган.
Изоҳ (0)