АҚШ президенти Дональд Трамп 19 май куни россиялик ҳамкасби Владимир Путин билан мулоқот қилишдан олдин Украина президенти Владимир Зеленский билан телефонда гаплашган. Бу ҳақда The Wall Street Journal хабар берди.
Манбаларга кўра, сиёсатчилар Путин билан мулоқотдан олдин қисқача суҳбатлашиб, ўзларининг дипломатик стратегияларини келишиб олган. Украина президенти Россия раҳбари билан 30 кунлик ўт очишни тўхтатиш ҳақида гаплашишни, Россия-Украина саммитини унинг иштирокида ўтказишни муҳокама қилишни сўраган.
Зеленскийнинг ўзи америкалик ҳамкасби билан бўлиб ўтган мулоқот тафсилотларини кечроқ ошкор қилди. Унга кўра, Трампни янги санкциялар жорий этиш ҳақида ўйлашга, агар Россия урушни давом эттириш тарафдори бўлса, уларни қўллашга чақирган.
Мен ундан Путин билан суҳбатдан олдин бизнинг иштирокимизсиз Украина бўйича қарор қабул қилмаслигини сўрадим. Биз учун бу принципиал ва жуда муҳим нарса, деди сиёсатчи.
Украина етакчиси Трамп учун энг муҳими Киев ва Москва ўртасида тўғридан-тўғри музокараларга эришиш деган хулосага келди. У Москвадан ўт очишни тўхтатиш ва уларнинг кейинги қадамлари қандай бўлиши мумкинлиги ҳақида “сигналлар” кутади:
Мен президент Трампдан, агар Россия томонининг қарашлари Украина томонидан қўллаб-қувватланмаса, бу ҳақда гаплашиш имкониятига эга бўлишимизни сўрадим. Шунингдек, АҚШ буни айнан Россия томонининг урушни тугатишни истамаслиги сифатида кўришини хоҳлаймиз, деди Украина раҳбари.
Зеленскийнинг таъкидлашича, булар фақат умумий масалалар, шу сабабли у ҳозир жиддий ва кучли санкциялар жорий этиш имкониятини муҳокама қилмоқда. Бундан ташқари, барча томонлар — АҚШ, Украина, Россия ва Европа мамлакатлари ўртасида янги учрашув ўтказиш имконияти кўриб чиқилмоқда. Ушбу учрашув Туркия, Ватикан ёки Швейцарияда ўтказилиши мумкин.
Путин билан суҳбатдан сўнг Трамп қайта Зеленский, Франция президенти Эммануэль Макрон, Италия бош вазири Жоржа Мелони, Финляндия етакчиси Александр Стубб, Германия канцлери Фридрих Мерц ва Еврокомиссия раҳбари Урсула фон дер Ляйе билан бир соатдан ортиқ мулоқот қилган. Улар нима ҳақида гаплашганига аниқлик киритилмаган.
Трамп ва Путин суҳбати
19 май куни АҚШ ва Россия раҳбарлари ўртасида телефон орқали мулоқот бўлиб ўтди. Қўнғироқдан олдин вице-президент Жей Ди Венс суҳбат чоғида Путиндан Украина билан тинчликка жиддий киришиш-кирмаслиги сўралишини айтди.
Кейинроқ Путиннинг ўзи суҳбат икки соат давом этганини маълум қилди. У суҳбатни “очиқ, мазмунли ва жуда фойдали” деб атади. У Трампга Россия ва Украина ўртасидаги тўғридан-тўғри музокараларни қайта тиклашда иштирок этаётгани учун миннатдорлик билдирди.
Шунингдек, Россия Украина билан ўт очишни тўхтатишни ўз ичига олган меморандум устида ишлашга тайёрлигини айтди. Томонлар барча томонларни қониқтирадиган келишувларни топишлари керак.
Путиннинг меморандум ҳақидаги баёнотига Зеленский муносабат билдирди. У Украина ҳозирча бу борада Россиядан ҳеч қандай таклиф олмагани, Украина ўз ҳудудларини бермаслигини маълум қилди.
АҚШ раҳбари ҳам суҳбат ҳақида маълумот берди. У Россия ва Украина зудлик билан ўт очишни тўхтатиш ва урушни тугатиш бўйича музокараларни бошлашини айтди. АҚШ президенти бу ҳақда Украина президенти, Европа комиссияси раиси ва бошқа Европа етакчиларига маълум қилганини таъкидлади.
Изоҳ (0)