АҚШ президенти Дональд Трамп маъмурияти юз минглаб муҳожирларни, жумладан, АҚШда истиқомат қилаётган 200 мингдан ортиқ украиналикни депортация қилиш режасини ишлаб чиққан. Бу ҳақда The Washington Post хабар бермоқда.
“Трамп маъмурияти хорижий ёрдам учун ажратилган 250 миллион долларгача маблағни фаол можаро ҳудудларидан келган одамларни, жумладан, 700 минг украиналик ва гаитилик муҳожирларни депортация қилиш ва қайтаришни молиялаштиришга йўналтиришни режалаштирмоқда”, дейилади хабарда.
Украина ва Гаитидан келганлардан ташқари, Афғонистон, Судан, Ливия, Яман ва бошқа мамлакатлар фуқаролари ҳам депортация қилиниши мумкин. Шунингдек, ушбу ташаббус анъанавий равишда бундай жараёнларни мувофиқлаштирувчи Халқаро миграция ташкилотини (ХМТ) четлаб ўтиши мумкинлиги таъкидланган.
Аниқлик киритилишича, АҚШнинг собиқ президенти Жо Байден маъмурияти Украина фуқароларига вақтинчалик ҳимоя мақомини биринчи марта 2022 йилда Россия билан можаро бошланганидан сўнг тақдим этган.
Гаитиликлар бу мақомдан 2010 йилда мамлакатда даҳшатли зилзила содир бўлганидан бери фойдаланиб келмоқда ва кейинчалик минтақадаги хавфсизлик муаммолари ва беқарорлик туфайли бу мақом бир неча бор узайтирилган.
Илгари АҚШ президенти маъмурияти ҳокимият тепасига келганининг биринчи йилида 1 миллионгача муҳожирни мамлакатдан чиқариб юбориш ниятида экани маълум қилинганди.
Бундан олдин Трамп 2026 йилги бюджет лойиҳасида мигрантлар ва қочқинларни кўчириш дастурларини молиялаштиришни тўхтатишни таклиф этган эди.
Аввалроқ Трамп ноқонуний муҳожирларни ҳимоя қилувчи шаҳарларга молиявий ёрдам беришни тўхтатишга қарор қилганди.
Изоҳ (0)