Украина Россиянинг бешта ҳудудидаги стратегик аэродромларига дронлар билан зарба бериб, камида 40 та самолётни ишдан чиқарди. Украина хавфсизлик хизмати “Ўргимчак тўри” номли мазкур операцияга бир ярим йилдан ортиқ тайёргарлик кўрган. Бу ҳақда манбаларга таяниб, “УНИАН” хабар берди.
Хабардор шахсларга кўра, операцияни шахсан Украина президенти Владимир Зеленский назорат қилган. Бевосита амалга оширилишини эса Василий Малюк бошчилигидаги Украина хавфсизлик хизмати таъминлаган. Ўтказилган операция натижасида Россия стратегик авиациясининг 41 та самолётига зарба беришга муваффақ бўлинган. Буни ҳозирча мустақил равишда тасдиқлашнинг иложи бўлмаган.
Россия томони йўқотишлар ҳақида маълумот бермаган. Манбалар операцияни логистика нуқтайи назаридан ўта мураккаб деб тавсифлайди.
Таъкидланишича, Украина махсус хизматлари аввал ФПВ дронларини Россия ҳудудига ўтказган. Сўнгра у ерга кўчма ёғоч конструкцияларни етказиб берган. Дронлар юк машиналарига ўрнатилган ушбу конструкцияларга яширилган.
Ҳужум пайтида конструкция қопқоқлари масофадан очилган, шундан кейин дронлар нишонларга — Россия ҳарбий самолётларига йўналтирилган. Мавжуд видеоматериалларда дронларни зарба беришга тайёрлаш жараёни акс эттирилган.
Бундан ташқари, операциянинг барча иштирокчилари аллақачон Украина ҳудудида экани таъкидланган.
Изоҳ (0)