Оқ уй Байден маъмурияти билан эришилган келишувга мувофиқ Украинага берилиши керак бўлган 20 минг ракетани Яқин Шарққа ўтказган. Бу ҳақда украиналиклар етакчиси Владимир Зеленский ABC News телеканалига берган интервьюсида маълум қилди. Унинг айтишича, ракеталар Shahed камикадзе дронларини уриб тушириш учун махсус ишлаб чиқарилган эди.
Зеленский, шунга қарамай, ракеталар қиммат бўлмаганини қўшимча қилиб, Россиянинг ҳаво ҳужумлари унинг мамлакати учун жиддий хавф туғдираётганини таъкидлади.
“Биз бу лойиҳага таянган эдик. Орамиздаги келишув 20 000 ракетани назарда тутган. Shahed’га қарши ракеталар. Улар қиммат эмас эди, лекин — махсус технология. Шунинг учун биз айнан шу 20 000 ракетага умид қилган эдик. Бугун эрталаб мудофаа вазирим менга айтдики, АҚШ бу ракеталарни Яқин Шарққа ўтказиб юборган”, деди Зеленский.
Россия 2022 йилнинг иккинчи ярмидан бошлаб Украина инфратузилма объектларига Shahed типидаги камикадзе дронлардан интенсив зарба бера бошлади. Мазкур турдаги учувчисиз учиш қурилмалари арзон бўлиб, бу уларни кўп сонда қўллаш имконини беради. Бироқ улар паст учгани боис, қисқа масофали зенит ракеталар, ҳатто стандарт зенит қуроллар ёрдамида уриб тушириш мумкин.
Кенг кўламли урушнинг тўртинчи йилига келиб, Россия бу турдаги дронлар ишлаб чиқаришни кескин оширди. Украина манбаларига кўра, руслар биргина 6 июнь тунида 407 та учувчисиз учиш қурилмаси билан зарба берган.
Украиналиклар уларни аниқлаш ва зарарсизлантириш учун турли ечимларга қўл урмоқда. Дрон овлайдиган мобил бригадалар, Иккинчи жаҳон уруши самолётлари шулар жумласидан.
Изоҳ (0)